Apple o‘z mahsulotlaridagi texnologiyalarni takomillashtirish davomida yangi funksiyalarni joriy etmoqda. Ammo bu safar kompaniya o‘z foydalanuvchilarini ogohlantirmasdan amalga oshirilgan harakati sababli maxfiylik masalalarida bahs-munozaralarga sabab bo‘ldi. Ma’lumotlarga ko‘ra, iPhone va Mac qurilmalarida “Takomillashtirilgan vizual qidiruv” funksiyasi ishga tushirilgan. Ushbu texnologiya suratlarni sun’iy intellekt yordamida tahlil qiladi va shifrlangan ma’lumotlarni Apple serverlariga uzatadi.
Texnologiya qanday ishlaydi?
iOS 18.1 va macOS 15.1 operatsion tizimlari yangilanishi bilan barcha foydalanuvchi qurilmalarida standart ravishda faollashtirilgan “Takomillashtirilgan vizual qidiruv” funksiyasi 2024-yil 28-oktyabrdan boshlab ishga tushirildi. Funksiya fotosuratlardagi diqqatga sazovor joylarni aniqlaydi, ularni tahlil qilib, shifrlangan ma’lumotlar asosida qidiruvni amalga oshiradi. Natijalar qayta foydalanuvchining qurilmasiga yuboriladi va shifrlanadi. Apple ma’lumotlar xavfsizligi uchun gomomorf shifrlash va differensial maxfiylik texnologiyalaridan foydalanayotganini ta’kidlamoqda. Shu orqali ma’lumotlar himoyasi ta’minlanadi, deya ishontirmoqda kompaniya.
Maxfiylik muammolari
Foydalanuvchilarni ogohlantirmasdan amalga oshirilgan texnologiyaning joriy etilishi maxfiylik bo‘yicha savollarni yuzaga keltirdi. Ayrim tanqidchilar Apple foydalanuvchilarning ruxsatisiz suratlarni skanerlayotgani va bu jarayonda bildirishnoma bermagani sababli maxfiylik huquqining buzilganini ta’kidlamoqda. Kompaniya foydalanuvchilarga ushbu funksiyani o‘chirib qo‘yish imkoniyatini taqdim etayotganini bildirgan, biroq nima uchun funksiyaning standart tarzda yoqilgan holda kelayotgani haqida batafsil ma’lumot bermagan.
Apple uchun yangi mojaro
Apple avvalroq ham maxfiylik bilan bog‘liq da’volarga duch kelgan edi. Xususan, kompaniya “Siri” ovozli yordamchisi orqali foydalanuvchilar maxfiyligini buzgan deb topilgan va bu bo‘yicha $95 million to‘lagan. “Takomillashtirilgan vizual qidiruv” funksiyasi esa bu borada yangi bosqichga qadam tashlagan ko‘rinadi. Texnologiyalar rivoji bilan birga maxfiylikni himoya qilish talablari ham o‘sib bormoqda. Apple kabi kompaniyalar nafaqat innovatsiyalar, balki foydalanuvchilar huquqlarini ta’minlash borasida ham javobgarlikni oshirishi kerak.
