O‘zbekiston 2026-yilda Jahon Savdo Tashkilotiga (JST) a’zo bo‘lishni rejalashtirib, ushbu maqsadni amalga oshirish uchun harakatlarni jadallashtirmoqda. JSTga a’zo bo‘lish bo‘yicha ishchi guruhning 9-yig‘ilishi 5-6 dekabr kunlari bo‘lib o‘tib, unda Bosh vazir o‘rinbosari Jamshid Xo‘jayev boshchiligidagi delegatsiya mamlakatning ushbu maqsadga intilyotganini yana bir bor tasdiqladi.
JST a’zolari O‘zbekistonning siyosiy qat’iyatini yuqori baholab, mamlakatni savdo tizimini xalqaro standartlarga moslashtirish bo‘yicha ishlashni davom ettirishga undadi. Ushbu jarayonning ahamiyatini ta’kidlagan Xo‘jayev JSTga a’zo bo‘lish nafaqat texnik jarayon, balki ichki islohotlar uchun muhim turtki ekanini qayd etdi.
«Bu maqsad O‘zbekistonning global savdo tizimiga integratsiyalashuvi muqarrarligini ko‘rsatadi. 2025-yilda muzokaralarni yakunlash va qonunchilikni JST normalariga moslashtirishga e’tibor qaratiladi», – dedi Xo‘jayev.
Delegatsiya tarkibida Prezidentning JST bo‘yicha maxsus vakili Azizbek O‘runov, iqtisodiyot vaziri o‘rinbosari Ahadbek Xaydarov va boshqa davlat idoralari vakillari ishtirok etdi. Ayrim a’zolar Toshkentdan masofadan bog‘lanish orqali yig‘ilishda qatnashdi.
Bosh muzokarachi Azizbek O‘runovning ta’kidlashicha, O‘zbekiston JSTning yana 9 a’zosi bilan ikki tomonlama muzokaralarni muvaffaqiyatli yakunlab, bu ko‘rsatkichni 22 taga yetkazdi. Bu yutuq JSTga qo‘shilish jarayonidagi sezilarli progressni aks ettiradi.
JST Bosh direktori o‘rinbosari Szyanchchen Chjan O‘zbekistonning keng qamrovli islohotlarini, jumladan, Prezidentning milliy qonunchilikni JST talablariga moslashtirishga qaratilgan DP-85 farmonini yuqori baholadi. Ushbu islohotlar Prezident Shavkat Mirziyoyevning iqtisodiyotni modernizatsiya qilish va global integratsiyani jadallashtirish strategiyasiga hamohangdir.
Ishchi guruh raisi, Janubiy Koreya vakili Yoon Seong-Dok O‘zbekistonning ikki tomonlama va ko‘p tomonlama darajadagi yutuqlarini yuqori baholadi. U mamlakatning Xalqaro valyuta jamg‘armasi, Jahon banki va JST kabi asosiy xalqaro tashkilotlar bilan samarali hamkorligini alohida ta’kidladi.
Ishchi guruh JSTga a’zo bo‘lish bo‘yicha O‘zbekistonning majburiyatlarini o‘z ichiga olgan loyihaviy hisobotni va qonunchilikka kiritilgan so‘nggi o‘zgarishlarni ko‘rib chiqdi. 2024-yil may oyidan boshlab, O‘zbekiston JST standartlariga moslashish maqsadida 192 ta yangi huquqiy hujjatni qabul qildi.
Ambassador Yoon yaqin yillarning ahamiyatini ta’kidlab, shunday dedi: «Kelgusi yetti-sakkiz oy 2026-yilda jarayonni yakunlash maqsadiga erishish uchun juda muhim bo‘ladi.»
Avvalroq xabar berilganidek, O‘zbekiston JSTga qo‘shilish bo‘yicha Xitoyning qo‘llab-quvvatloviga erishgandi. Tashkilotga qo‘shilish O‘zbekiston keng iqtisodiy islohotlarining asosiy ustuni bo‘lib, mamlakatning global savdo tizimiga integratsiyalashuvini belgilaydi.
