O‘zbekistonda 2030-yilga qadar startaplar sonini 5000 taga yetkazish rejalashtirilmoqda, bu esa kamida 20 mingta yangi ish o‘rni yaratish imkonini beradi. Bu haqida 20-yanvar kuni Prezident Shavkat Mirziyoyev raisligida o‘tkazilgan yig‘ilishda ma’lum qilindi.
Tadbirda ta’kidlanishicha, 2024–2025-yillarda mamlakat startap va venchur ekotizimining umumiy qiymati 3,9 mlrd dollarga yetgan. Bugungi kunda 750 dan ortiq mahalliy startaplar mavjud bo‘lib, ularni 15 ta venchur fondi qo‘llab-quvvatlamoqda, venchur kapitalining umumiy hajmi esa 180 mln dollardan oshgan. 2030-yilga kelib ushbu ko‘rsatkichni 2 mlrd dollarga yetkazish ko‘zda tutilgan.
Mamlakatda startaplarni qo‘llab-quvvatlash bo‘yicha g‘oya, ishlanma, ishga tushirish va kengaytirish (masshtablashtirish) bosqichlarini qamrab oluvchi to‘rt bosqichli tizim joriy etilmoqda. Bunda grantlar, soliq imtiyozlari, hamkorlikda moliyalashtirish mexanizmlari va eksport xarajatlarini qoplash ko‘zda tutilgan.
«Biz oldimizga qiymati 1 mln dollardan yuqori bo‘lgan kamida 500 ta, 10 mln dollarlik 100 ta va qiymati 100 mln dollardan oshadigan 25 ta startap-loyihani shakllantirish vazifasini qo‘ymoqdamiz. Prezident faqat qaror qabul qilish bilan cheklanib qolmay, ushbu tashabbuslarni keng targ‘ib qilish va ommalashtirishni ta’minlash bo‘yicha topshiriq berdi», — dedi Raqamli texnologiyalar vaziri Sherzod Shermatov «O‘zbekiston 24» telekanaliga bergan intervyusida.
Vazir, shuningdek, Prezident tomonidan sun’iy intellekt sohasidagi qonun imzolanganini, mazkur hujjat SI texnologiyalaridan foydalanishda suiiste’molliklarning oldini olishga qaratilganini ma’lum qildi. «Bungacha sun’iy intellektning o‘zi nima ekanligi, u qanday ishlashi va qaysi sohalarda qo‘llanilishi mumkinligi borasida aniq tayanch tushunchalar, shuningdek, tegishli huquqiy asos mavjud emas edi», — deya ta’kidladi Shermatov.
Sun’iy intellektni qo‘llash ko‘lamini kengaytirish doirasida mamlakatning 15 ta yetakchi oliygohida laboratoriyalar tashkil etish rejalashtirilgan. U yerda bitiruvchilar sun’iy intellekt sohasida yetakchi ekanligini tasdiqlovchi sertifikatlarga ega bo‘lishlari va o‘z kasbiy yo‘nalishida kamida bitta chet tilini bilishlari talab etiladi. MyGov.uz portaliga esa kamida 100 ta yangi raqamli xizmat qo‘shiladi.
Prezident 50 dan ortiq xizmatlarga sun’iy intellekt texnologiyalarini joriy etish, Aholining yagona reyestrini yaratish, shuningdek, biznes ochish, yakka tartibdagi tadbirkorlar xodimlarini hisobga olish, bank kartalarini rasmiylashtirish, SIM-karta olish, sug‘urta va reklama xizmatlarini ko‘rsatish jarayonlarini to‘liq raqamlashtirish bo‘yicha topshiriq berdi.
Bundan tashqari, davlat rahbari hududlarda 5G texnologiyalari, yuqori tezlikdagi internet va sun’iy yo‘ldosh aloqasini kengaytirish zarurligiga alohida urg‘u berdi.
Ushbu choralar iqtisodiyotni kompleks raqamlashtirishni ta’minlash va O‘zbekistonda innovatsion kompaniyalarni keng ko‘lamda rivojlantirish uchun sharoit yaratishga qaratilgan.
