O‘zbekiston shaxsiy ma’lumotlarni saqlash va qayta ishlashga oid qonunchilikni o‘zgartirdi. 2026-yil mart oyida qabul qilingan yangi tartib ayrim ma’lumotlarni belgilangan shartlar asosida xorijda saqlash imkonini beradi. Bu o‘zgarish mamlakatning global raqamli xizmatlar bilan integratsiyasini kengaytirishga qaratilgan.
Qanday o‘zgarishlar kiritildi?
O‘RQ-1125-son qonunga ko‘ra, biometrik va genetik ma’lumotlar, shuningdek, telekommunikatsiya operatorlari xizmatlaridan foydalanuvchilarning ma’lumotlari O‘zbekiston hududida saqlanishi shart. Boshqa shaxsiy ma’lumotlarni esa tegishli himoya talablari bajarilgan taqdirda xorijda saqlash va qayta ishlash mumkin.
Xalqaro xizmatlar uchun yangi imkoniyatlar
The Diplomat tahliliga ko‘ra, avvalgi ma’lumotlarni mahalliylashtirish talablari ayrim xalqaro texnologik kompaniyalarning O‘zbekiston bozoriga kirishini qiyinlashtirgan. Yangi qoidalar bu to‘siqlarni kamaytirib, xalqaro raqamli platformalar va to‘lov xizmatlari bilan hamkorlikni kengaytirishi mumkin.
Jumladan, Apple Pay va Google Pay xizmatlarini ishga tushirish bo‘yicha muzokaralar olib borilayotgani qayd etilgan.
Islohotning natijasi yangi talablarning amalda qanday qo‘llanishi va xalqaro kompaniyalarning O‘zbekiston bozoriga kirish bo‘yicha qarorlariga bog‘liq.
