1-aprel kuni o‘tkazilgan matbuot anjumanida Soliq qo‘mitasi raisining birinchi o‘rinbosari Mubin Mirzayev Xitoyning mashhur e-tijorat platformasi Temu O‘zbekistonda 46 milliard so‘m miqdorida soliq to‘lamaganini ma’lum qildi. Bu – elektron savdo sohasida kuzatilayotgan kengroq muammoning bir qismi.
Nima bo‘ldi o‘zi?
O‘zbekiston 2024-yil oxirida elektron tijorat uchun yangi qoidalarni joriy qildi. 28-dekabrdan boshlab mamlakatda faoliyat yuritadigan xalqaro platformalar yuridik shaxs sifatida ro‘yxatdan o‘tishi shart bo‘ldi. Bu qoidalar soliq tizimini shaffoflashtirish va byudjet tushumlarini oshirishni ko‘zlaydi.
Ammo Temu bu talabni e’tiborsiz qoldirdi. Tashkilot faoliyatini keng reklama bilan olib bordi, biroq huquqiy ro‘yxatdan o‘tmadi va soliq to‘lamadi. Natijada, unga e’tiroz xati berildi va platforma 20-martdan boshlab O‘zbekistonda bloklandi.
Boshqalar nima qilmoqda?
Misol uchun, Wildberries platformasi 51 milliard so‘mdan ortiq soliq to‘lagani sababli unga ijobiy xulosa berildi. Demak, qonunchilikka amal qilgan platformalar bemalol ishlashda davom etmoqda.
Temu hozir nima qilmoqda?
Mubin Mirzayevning so‘zlariga ko‘ra, Temu soliq to‘lovlarini bajarsa, uning faoliyatini rasmiylashtirish va tiklash imkoniyati mavjud. Ayni paytda Temu yuridik shaxs sifatida ro‘yxatdan o‘tgan, ammo blokirovka – u soliq to‘lamagan davr uchun o‘z kuchida qolmoqda.
Bu kimlar uchun muhim?
Elektron savdoga qiziqqan foydalanuvchilar, startapchilar va e-commerce platformalari uchun bu holat o‘rnak bo‘lishi kerak. Raqamli iqtisodiyot shaffoflikni talab qiladi – foyda ortidan soliq ham bo‘lishi shart.
