Chatbot Kimi ortidagi Moonshot AI kompaniyasi Gonkong fond birjasida IPO o‘tkazishga tayyorgarlik ko‘rmoqda. Shu bilan birga, kompaniyaning yangi Kimi K3 modeli kutilganidan ham katta qiziqish uyg‘otdi — natijada Moonshot yangi pullik obunalarni vaqtincha to‘xtatishga majbur bo‘ldi.
Bloomberg ma’lumotlariga ko‘ra, Moonshot aksiyadorlariga IPO tayyorgarligi boshlanganini ma’lum qilgan. Kompaniya yaqin olti oy ichida Gonkong birjasida ro‘yxatdan o‘tishni rejalashtirmoqda. IPO oldidan yakunlanayotgan yangi investitsiya raundi esa startup qiymatini 30 milliard dollardan yuqoriga olib chiqishi mumkin.
Bir necha kun avval taqdim etilgan Kimi K3 modeli AI hamjamiyatida katta rezonans uyg‘otdi. Moonshot ma’lumotiga ko‘ra, model ochiq vaznli (open-weight) bo‘lishiga qaramay, ko‘plab benchmarklarda OpenAI va Anthropic’ning eng kuchli modellariga yaqin natijalarni ko‘rsatmoqda. Ayniqsa dasturlash, agent vazifalari va reasoning testlarida K3 kuchli raqobatchi sifatida baholanmoqda.
Model ishga tushirilganidan ko‘p o‘tmay, Moonshot yangi foydalanuvchilar uchun pullik obunalarni vaqtincha yopishini e’lon qildi. Kompaniya bunga sabab sifatida juda yuqori talab va hisoblash quvvatlarining yetishmasligini ko‘rsatdi.
Kompaniya bayonotiga ko‘ra, mavjud obunachilar xizmatdan odatdagidek foydalanishda davom etadi. Yangi hisoblash quvvatlari ishga tushirilgani sari obunalar bosqichma-bosqich qayta ochiladi. Shuningdek, Moonshot kelajakda xizmatni ikki alohida tarifga ajratishni rejalashtirmoqda: oddiy Kimi foydalanuvchilari va dasturchilar uchun mo‘ljallangan Kimi Code obunasi.
Agar IPO muvaffaqiyatli amalga oshsa, Moonshot AI Xitoydagi frontier AI kompaniyalari orasida ommaviy bozorga chiqqan ilk yirik o‘yinchilardan biriga aylanishi mumkin. Bu kompaniyaga yangi kapital jalb qilish va Kimi platformasini yanada kengaytirish imkonini beradi.
