Anthropic IPO uchun tayyorlagan hujjatida o‘z AI modellari kelajakda insoniyat uchun jiddiy xavf tug‘dirishi mumkinligini ma’lum qildi. Bu haqda Reuters va Financial Times hujjat bilan tanishib xabar berdi.
Hujjat hali ommaga e’lon qilinmagan. Reuters ma’lumotiga ko‘ra, 261 sahifalik hujjatning 80 sahifasi kompaniya duch kelishi mumkin bo‘lgan xavflarga bag‘ishlangan. Biznesning o‘zi haqida esa 48 sahifa yozilgan.
Hujjatda AI modellari o‘z faoliyatini saqlab qolishga urinishi mumkinligi qayd etilgan. Masalan, model o‘chirilishiga qarshilik qilishi, ma’lumotni yashirishi yoki manipulyatsiya qilishi, hatto shantajga o‘xshash harakatlarni amalga oshirishi mumkin.
2025-yilda Anthropic daromadi 12 baravar oshib, qariyb 4,6 mlrd dollarga yetgan. Shu bilan birga, kompaniyaning operatsion zarari 8,06 mlrd dollar bo‘lgan. 2024-yilda bu ko‘rsatkich 2,98 mlrd dollar edi.
Kompaniyaning sof zarari esa 42 mlrd dollarga yaqin bo‘lgan. Buning taxminan 34 mlrd dollari hisob-kitob xarajatlari bilan bog‘liq. Bu real pul chiqimi emas, balki aksiyaga aylanishi mumkin bo‘lgan moliyaviy instrumentlar qiymatining oshishi natijasida yuzaga kelgan.
Anthropic’ning umumiy operatsion xarajatlari 12,65 mlrd dollarni tashkil etgan. Shundan 7,33 mlrd dollar AI modellarini ishlatish uchun kerak bo‘ladigan hisoblash quvvati va infratuzilmaga sarflangan. Bu 2024-yilga nisbatan qariyb uch baravar ko‘p.
2025-yil oxirida kompaniyada 20,28 mlrd dollar naqd pul va qisqa muddatli investitsiyalar bo‘lgan. Biroq Anthropic daromadining deyarli choragi atigi ikki mijoz hissasiga to‘g‘ri kelgan. Yirik mijozlarning aksariyati kompaniya bilan uzoq muddatli shartnomaga ega emas. Shu sababli ular kelajakda AI xizmatlariga sarflaydigan mablag‘ini kamaytirishi mumkin.
Anthropic kelgusi yillarda cloud xizmatlari, hisoblash quvvati va infratuzilmaga taxminan 518 mlrd dollar sarflashni rejalashtirmoqda. Bu xarajatlarning katta qismi kompaniya ulardan to‘liq foydalansa ham, foydalanmasa ham to‘lanishi kerak bo‘lgan majburiyatlardan iborat.
Anthropic IPO vaqtida kompaniya qiymati 2 trln dollardan yuqori bo‘lishini kutmoqda. Bu may oyida taxmin qilingan 965 mlrd dollarlik bahodan ikki baravardan ko‘proq.
