Aman startapi, kattalar va bolalar uchun shaxsiylashtirilgan xavfsizlik platformasini ishlab chiqqan kompaniya, birinchi investitsiya bosqichida 300 ming AQSh dollari miqdorida sarmoya jalb qilganini ma’lum qildi. Mablag‘lar Qozog‘istonda xizmatni kengaytirish hamda xalqaro bozorga chiqish uchun yo‘naltiriladi.
Dastlabki investorlar qatoriga loyihaga nafaqat moliyaviy, balki ijtimoiy qadriyatlar jihatidan ham ishonch bildirgan xususiy tadbirkorlar kiritildi. Ular Aman konsepsiyasida jamiyat uchun ahamiyatli va uzoq muddatli istiqbolga ega echimni ko‘rishdi.
Aman mobil ilovasi foydalanuvchilarga favqulodda holatlarga, jumladan, maishiy zo‘ravonlik, hujum yoki boshqa xavfli vaziyatlarga tezkor javob qaytarish imkonini beradi. Ilova ikki rolni taklif etadi: kattalar yoki bolalar, har birining o‘ziga xos funksional imkoniyatlari mavjud.
Kattalar uchun SOS tugmasi bosilganda, geolokatsiya avtomatik tarzda yaqin insonlarga yuboriladi. Shu bilan birga, atrofdagi holatning 5 daqiqalik audioyozuvi amalga oshiriladi va 30 kun davomida profilga saqlanadi. Tasodifiy chaqiruv holatida signalni maxsus tasdiqlash oynasida bekor qilish mumkin.
Bolalar rejimida esa SOS signali faqat ota-onalarga yuboriladi. Shuningdek, ota-onalar uchun bolalarning harakat trayektoriyasini kuzatish, xavfsiz hududlarni belgilash hamda messenjerlardagi yozishmalarni potentsial tahdidlar yuzasidan monitoring qilish imkoniyatlari taqdim etiladi.
Dastlab, Aman xususiy xavfsizlik agentliklari bilan hamkorlikda xizmat ko‘rsatgan. Biroq xizmatni kengaytirish jarayonida bunday model ayniqsa kichik shaharlarda tezkorlik va qamrov bo‘yicha yetarli emasligi ayon bo‘ldi. Hozirda kompaniya yordam so‘rovlarini bevosita davlat tezkor xizmatlariga yo‘naltirish imkonini beruvchi texnik integratsiyani amalga oshirmoqda. Ushbu funksiya yaqin orada ishga tushirilishi kutilmoqda.
Loyiha g‘oyasi Arushan Mede tomonidan shaxsiy tajriba va xavotirli statistikani — bolalar yo‘qolishi, yordamga muhtoj ayollarning o‘z vaqtida yordam ololmaslik holatlarini tahlil qilish asosida ishlab chiqilgan.
Aman dastlab o‘z mablag‘lari hisobidan ishga tushirilgan. Jamoa mahsulotga talab mavjudligini sinov tariqasida aniqlaganidan so‘nggina investorlarni jalb qilishga qaror qilgan.
Arushan Mede, Aman hammuassisi:
“Biz jarayonni noldan boshladik: ehtiyojni aniqladik, foydalanuvchilar fikrlarini tahlil qildik va dastlabki natijalarga erishdik. Shundan so‘nggina gipotezamizni tasdiqlab, investorlar oldida sarmoya jalb qilish bosqichini ochdik. Ushbu sarmoya nafaqat moliyaviy yordam, balki startapning haqiqiy ijtimoiy ahamiyatga ega ekanligini ham tasdiqladi.”
Bugungi kunda Aman butun Qozog‘iston hududida faoliyat yuritmoqda. Ilova App Store va Google Play do‘konlarida qozog‘ va rus tillarida mavjud. Foydalanuvchilar individual yoki besh kishigacha bo‘lgan oilaviy obunani rasmiylashtirishlari mumkin. Bunda besh kunlik bepul sinov davri taqdim etiladi.
Kompaniya yaqin kelajakda tezkor xizmatlar bilan to‘liq integratsiyani yakunlash va xalqaro bozorga chiqishni rejalashtirgan. Dastlabki bosqichda Turkiya va Ozarbayjon bozorlariga kirish rejalashtirilgan.
Aman loyihasining asosiy maqsadi — butun dunyo bo‘ylab foydalanuvchilarga yuqori sifatli va tezkor xavfsizlik xizmatlarini taqdim etadigan ishonchli tizimni yaratishdir.
