IT Park Uzbekistan va Moskva shahridagi Kreativ sanoatlar agentligi (KSA) o‘rtasida video o‘yinlar industriyasini rivojlantirish bo‘yicha memorandum imzolandi. Muzokaralarda IT Park’ning xizmatlar eksportini rivojlantirish bo‘yicha direktori Mahliyo Muksinova, KSA bosh direktori Gulnora Agamova hamda “Video o‘yin sanoatini rivojlantirish” NNT bosh direktor o‘rinbosari Aleksandr Bodrov ishtirok etdi.
Hamkorlikning asosiy yo‘nalishlari:
- Moskva video o‘yinlar habi orqali o‘zbek o‘yin studiyalarini qo‘llab-quvvatlash
- Qo‘shma akseleratsiya va ta’lim dasturlarini ishga tushirish
- Akselerator yaratish bo‘yicha muzokaralarni boshlash
- O‘zbekiston va Rossiyadagi yirik GameDev tadbirlarda ishtirokni ta’minlash
Memorandumga ko‘ra, IT Park Uzbekistan va o‘zbek o‘yin studiyalari noyabr oyida Moskvada o‘tkaziladigan Video o‘yinlar haftaligi va Kreativ sanoatlar haftaligida qatnashadi. Shuningdek, KSA vakillari bu yilgi ICT Week 2025 doirasida IT Park tadbirlariga tashrif buyurish niyatini bildirishdi.
Kreativ sanoatlar agentligi (KSA) — 2020-yilda Moskva hukumati tashabbusi bilan tashkil etilgan kreativ biznesni qo‘llab-quvvatlash markazi bo‘lib, san’at, arxitektura, video o‘yinlar, dasturiy ta’minot, dizayn, kino va boshqa yo‘nalishlarda tadbirkorlikni rivojlantirishni qo‘llab-quvvatlaydi. KSA ko‘magida “Skolkovo” markazida Rossiyadagi ilk video o‘yinlar va animatsiya ishlab chiquvchilar klasteri — Moskva video o‘yinlar habi faoliyat yuritmoqda.
Hamkorlikning ahamiyati:
- xalqaro tajriba almashish imkoniyati
- ta’lim va infratuzilmadan foydalanish
- ixtisoslashgan hablarda tezroq rezidentlikka erishish
- yangi bozorlar va investorlarga chiqish
Mazkur memorandum O‘zbekistonning GameDev ekotizimini yanada rivojlantirish va mamlakatni mintaqaviy kreativ markazlardan biriga aylantirish yo‘lida muhim qadam bo‘ldi.
