Apple kompaniyasi WWDC 2026 konferensiyasida sun’iy intellekt strategiyasining navbatdagi bosqichini namoyish etdi. Tadbir markazida esa kompaniyaning yillar davomida tanqid qilinib kelgan ovozli yordamchisi — Siri turdi.
Yangi taqdim etilgan Siri avvalgidan ancha aqlli, kontekstni yaxshiroq tushunadigan va foydalanuvchining qurilmalaridagi ma’lumotlar bilan chuqurroq ishlay oladigan yordamchiga aylantirilmoqda. Apple ushbu yangilanishni kompaniyaning AI bozoridagi eng muhim qadami sifatida ta’riflamoqda.
Siri endi ekrandagi ma’lumotlarni ham tushunadi
Apple ta’kidlashicha, yangi Siri foydalanuvchi ekranida nimalar ochilganini anglay oladi, elektron pochta, xabarlar va fotosuratlardagi ma’lumotlardan foydalanib kontekstli javoblar bera oladi. Masalan, foydalanuvchi ekrandagi ma’lumotga ishora qilib savol bersa, Siri aynan shu kontekst asosida javob qaytaradi.
Bundan tashqari, Siri kundalik vazifalarni avtomatlashtirish, eslatmalar yaratish, xabarlarni tahlil qilish va ilovalar o‘rtasida murakkab amallarni bajarish imkoniyatlariga ega bo‘ladi.
Apple Intelligence ekotizimi kengaymoqda
WWDC 2026 davomida Apple Apple Intelligence platformasini ham sezilarli darajada kengaytirdi. Kompaniya sun’iy intellekt imkoniyatlarini Photos, Safari va boshqa standart ilovalarga integratsiya qilmoqda.
Yangi funksiyalar orasida:
-AI yordamida matn yozish va tahrirlash;
-Kengaytirilgan ovozli diktovka;
-Vizual kontentni tushunish;
-Aqlli foto tahrirlash vositalari;
-Ilovalar bo‘ylab yagona AI tajribasi mavjud.
Apple OpenAI va Google bilan raqobatga kirishmoqda
So‘nggi ikki yil davomida OpenAI, Google va Anthropic generativ AI bozorida yetakchilik qilib kelayotgan bir paytda Apple ehtiyotkor strategiyani tanlagan edi. Endilikda kompaniya Siri’ni markaziy AI mahsulotiga aylantirib, o‘zining 2,5 milliarddan ortiq qurilmalardan iborat ekotizimidan foydalanishga harakat qilmoqda.
Tahlilchilarga ko‘ra, Apple’ning asosiy ustunligi eng kuchli model yaratishda emas, balki sun’iy intellektni millionlab foydalanuvchilarning kundalik ish jarayonlariga integratsiya qilishda bo‘lishi mumkin.
WWDC 2026 Apple uchun oddiy dasturiy ta’minot yangilanishlari taqdimoti emas, balki kompaniyaning AI poygasidagi yangi start nuqtasi bo‘ldi. Agar yangi Siri va Apple Intelligence kutilgan natijalarni bersa, Apple uzoq yillardan beri ilk bor sun’iy intellekt bozoridagi asosiy o‘yinchilardan biriga aylanishi mumkin.
Bu esa OpenAI, Google va Anthropic bilan raqobatning yanada keskinlashishini anglatadi.
