Startup Garage rezidenti Aziza AI loyihasi 26–29-avgust kunlari Pekinda bo‘lib o‘tgan HICOOL 2026 Global Entrepreneur Summit doirasida Xitoyning HR va texnologiya ekotizimi vakillari bilan muzokaralar olib bordi.
Sammit Aziza AI jamoasiga o‘zining sun’iy intellekt asosidagi HR yechimlarini xalqaro auditoriyaga, potensial mijozlar va texnologik hamkorlarga taqdim etish imkonini berdi.
Tadbir davomida Aziza AI bir qator yirik tashkilotlar bilan pilot rejimida hamkorlikni boshlash bo‘yicha dastlabki kelishuvlarga erishdi. Xitoydagi tashkilotlar bilan dastlabki kelishuvlar
Tadbir davomida Aziza AI bir qator yirik tashkilotlar bilan pilot rejimida hamkorlikni boshlash bo‘yicha dastlabki kelishuvlarga erishdi. Ular orasida:
– Shanghai Foreign Service Group Co., Ltd. – HR va employment xizmatlari yo‘nalishida;
– ENIGMA World Employment Confederation – bandlik va HR ekotizimi yo‘nalishida;
– Beijing Changfeng Information Technology Industry Alliance – texnologik hamkorlik yo‘nalishida;
– WolfRun AI – sun’iy intellekt yordamida video intervyularni yanada tabiiylashtirish va texnik rivojlantirish yo‘nalishida.
Kelishuvlarning dastlabki bosqichi doirasida Aziza AI texnologiyasini Xitoyning HR bozorida sinovdan o‘tkazish, mahalliy jarayonlarga moslashtirish va keyingi integratsiya imkoniyatlarini o‘rganish rejalashtirilmoqda.
Xitoy bozoriga qadam
Xitoy dunyodagi eng yirik mehnat bozorlari va texnologik ekotizimlardan biri hisoblanadi. Shu sababli Aziza AI uchun HICOOL 2026 nafaqat xalqaro miqyosda o‘z mahsulotini namoyish etish, balki Xitoy bozorida real hamkorliklarni boshlash uchun ham muhim platformaga aylandi.
Bugungi kelishuvlar hozircha pilot bosqichda, ammo Xitoy tomonining Aziza AI texnologiyasiga bildirgan qiziqishi loyihaning xalqaro ekspansiyasi uchun muhim qadam bo‘ldi. O‘zbekistonda yaratilgan AI yechimi endi Xitoy bozorida sinovdan o‘tkazilmoqda. Aziza AI jamoasi uchun bu – xalqaro bozorga chiqish yo‘lidagi navbatdagi bosqich va Xitoyga qo‘yilgan ilk amaliy qadam.
