Google uzoq kutilgan yangi flagman sun’iy intellekt modeli – Gemini 2.0 Pro Experimental’ni rasman ishga tushirdi. Kompaniya bu xabarni boshqa bir qator sun’iy intellekt modellari taqdimoti doirasida e’lon qildi. Shuningdek, Google o‘zining “mantiqiy fikrlash” modeli bo‘lgan Gemini 2.0 Flash Thinking’ni ham Gemini ilovasida ommaga taqdim etmoqchi.
Biroq Google bu kabi sun’iy intellekt modellarini namoyish qilayotgan bir paytda texnologiya olami foydalanuvchilari Xitoyning DeepSeek startapining arzonroq mantiqiy fikrlash modellariga katta e’tibor qaratmoqda. DeepSeek’ning modellari Amerika texnologiya gigantlari tomonidan yaratilgan ilg‘or sun’iy intellekt modellari bilan munosib raqobat qilishi, hatto ularni ortda qoldirishi ham mumkin. Shuningdek, kompaniyalar DeepSeek API’dan foydalangan holda ushbu modellarni nisbatan arzon narxda ijaraga olishi ham mumkin.
Google va DeepSeek o‘tgan yilning dekabrida bir vaqtda sun’iy intellektga asoslangan “reasoning” modellarini chiqargan bo‘lsa-da, DeepSeekning R1 modeli ko‘proq e’tibor qozondi. Endilikda esa Google o‘zining ommabop Gemini ilovasi orqali Gemini 2.0 Flash Thinking modelini kengroq auditoriyaga yetkazmoqchi ekani yaqqol namoyon bo’lmoqda.
Gemini 2.0 Pro haqida to‘xtalsak: Google uni Gemini 1.5 Pro modelining davomchisi sifatida e’lon qildi va uni Gemini sun’iy intellekt modellari oilasidagi eng yetakchi namuna deya e’tirof etdi.
Kompaniya bundan bir hafta muqaddam Gemini ilovasining o‘zgarishlar jurnalida Gemini 2.0 Pro modelining chiqarilishi haqida rejalashtirilmagan holda e’lon berdi. Ammo bu safar barcha ma’lumotlar rasman tasdiqlandi. Google ushbu modelning sinov versiyasini Vertex AI va Google AI Studio platformalarida ishga tushirmoqchi. Shuningdek, Gemini ilovasi obunachilariga ham Gemini 2.0 Prodan foydalanish imkoniyati beriladi.
Google’ga ko‘ra, yangi model kod yozish hamda murakkab topshiriqlarni bajarish bo‘yicha juda samarali hamda avvalgi modellarga nisbatan “dunyo haqidagi bilimlarni yaxshiroq tushunish va mantiqan tahlil qilish” imkoniyatiga ega. Gemini 2.0 Pro foydalanuvchilar nomidan Google Search kabi vositalarga murojaat qilishi va kerak bo‘lganda kodni yozishi yoki buyruq berishi ham mumkin.
Bundan tashqari, Gemini 2.0 Proning kontekst oynasi 2 million tokendan iborat. Bu taxminan 1,5 million so‘zni bir martada qayta ishlash imkonini beradi. Boshqacha qilib aytganda, Google’ning eng so‘nggi modeli bitta so‘rovda “Garri Potter”ning yettita kitobini to‘liq qamrab ola oladi va yana taxminan 400 ming so‘z hajmidagi matnni sig‘dira oladigan “zaxira”ga ega bo‘ladi.
Google Gemini 2.0 Flash modelini keng ommaga taqdim etadi. Ushbu model 2024-yil dekabr oyida e’lon qilingan bo‘lib, endilikda barcha Gemini ilovasi foydalanuvchilari uchun ochiq bo‘ladi.
Qisqa qilib aytganda Google ayni vaqtda DeepSeek’ga nisbatan kuchayib borayotgan qiziqishni pasaytirish yoki unga raqobatchi yaratish maqsadida yangi, yanada iqtisodiy tejamkor Gemini 2.0 Flash-Lite modelini e’lon qilmoqda. Kompaniya ushbu model Gemini 1.5 Flash’ga nisbatan yuqoriroq hamda aniqroq natija ko‘rsatishi, ammo xuddi shu narx va tezlikda ishlashini ma’lum qildi.
Tayyorladi: Zuhraxon Mansurova
Fikr bildirish