Google Windows 11’dagi Chrome brauzerining “Inkognito” rejimida maxfiylikni kuchaytirishga qaratilgan yangi funksiyani sinovdan o‘tkazmoqda. PrivacySandboxFingerprintingProtectionEnabled deb nomlangan ushbu imkoniyat foydalanuvchini turli saytlar bo‘ylab qayta aniqlashga xizmat qiluvchi “device fingerprinting” (qurilma raqamli barmoq izi) usullaridan foydalanadigan uchinchi tomon skriptlarini bloklaydi.
Qanday ishlaydi
Funksiya yoqilganda, Chrome Canvas, WebGL, shrift aniqlash yoki audio tahlil kabi API’lar orqali noyob identifikatorlar to‘playdigan uchinchi tomon skriptlarini yuklashni to‘xtatadi. Bu esa reklamachilar uchun cookie-fayllarsiz ham foydalanuvchini kuzatishni ancha qiyinlashtiradi.
Bunda barcha domenlar bloklanmaydi — faqat MDL (Marked Domains List) ro‘yxatiga kiritilganlari. Domen uchinchi tomon sifatida harakat qilganda va foydalanuvchi qurilmasi yoki brauzeridan ortiqcha ma’lumot olishga urinayotganda ro‘yxatga kiritiladi.
Google bu tizimni joriy qilish uchun Fetch spetsifikatsiyasiga kichik o‘zgartirish taklif qilgan. Bu brauzerlarga odatdagi xavfsizlik tekshiruvlari (CSP tekshiruvi, aralash kontent tekshiruvi) o‘tgach, so‘rovlarni bloklash yoki himoya qilish imkonini beruvchi standart mexanizm yaratadi.
Masalan, agar domen Canvas, WebGL yoki shrift tekshirish orqali foydalanuvchining noyob identifikatorini shakllantirib, uni yuborsa, sayt egasi ushbu identifikator yordamida cookie-faylsiz ham foydalanuvchiga moslashtirilgan reklama ko‘rsatishi mumkin. Chrome’ning yangi “Inkognito” skript bloklash funksiyasi esa bunday skriptlarning yuklanishini oldini oladi.
Boshqa brauzerlar bilan taqqoslash
- Safari — Intelligent Tracking Prevention (ITP) orqali uchinchi tomon cookie-fayllari va kuzatuvchi skriptlarni to‘liq bloklaydi.
- Firefox — Enhanced Tracking Protection (ETP) funksiyasiga ega.
- Microsoft Edge — Tracking Prevention funksiyasini taklif qiladi.
Safari va Firefox oddiy ko‘rish rejimida ham tajovuzkor kuzatuvchi skriptlarni bloklasa, Chrome’ning yondashuvi ehtiyotkorroq — himoya faqat “Inkognito” rejimida va faqat ro‘yxatdagi domenlarga tatbiq etiladi.
Qaysi brauzerlarda bo‘ladi
Google bu funksiyani faqat Chrome’ning “Inkognito” rejimida joriy qilishini va barcha Chromium asosidagi brauzerlarda tatbiq etish rejalashtirilmaganini ma’lum qildi.
Yangi “Inkognito” rejimida manzil satrida “ko‘z” belgisi paydo bo‘ladi. U orqali joriy sayt uchun himoyani vaqtincha o‘chirib qo‘yish mumkin. Sozlamalarda esa funksiyani butunlay o‘chirish tugmasi bo‘ladi, chunki ba’zi saytlar skriptlar bloklanganda ishlamasligi mumkin.
Ushbu sinov Google Chrome 139 versiyasi chiqishi ortidan o‘tkazilmoqda. Yangi versiyada manzil satri va yangi oyna sahifasida sun’iy intellekt asosidagi qidiruv tavsiyalari paydo bo‘ldi, shuningdek, manzil satri orqali tezkor qidiruv yorliqlarini yaratish imkoniyatlari kengaytirildi.
Google to‘liq anonimlikka trafikni yo‘naltirishsiz erishish qiyinligini tan olsa-da, ushbu skript bloklash tizimi Chrome’ning “Inkognito” rejimida maxfiylikni oshirish yo‘lidagi navbatdagi qadam bo‘ladi.
