Markaziy Osiyo madaniy merosidan ilhomlangan «Kök Börü» nomli qisqa metrajli animatsion film dunyodagi eng nufuzli kompyuter grafikasi va animatsiya konferensiyalaridan biri — SIGGRAPH 2026 doirasida namoyish etildi. Film AI video platformasi Higgsfield tomonidan ishlab chiqilgan bo‘lib, loyiha konferensiyaning NVIDIA AI in Production Day dasturida ham taqdim etildi.
15 daqiqalik film XV asrdagi Markaziy Osiyoda kechadigan voqealarni hikoya qiladi. Syujet an’anaviy ko‘k bo‘ri (kokpar) o‘yinidan ilhomlangan bo‘lib, bo‘ron vaqtida bo‘rilar to‘dasi olib ketgan qizini yillar o‘tib izlashga otlangan ko‘chmanchi ona Ana haqida hikoya qiladi. Mualliflarning aytishicha, loyiha orqali xalqaro auditoriyani Markaziy Osiyoning kam yoritilgan tarixi va madaniyati bilan tanishtirish maqsad qilingan.
Film qirg‘izistonlik rejissyor Shakhnazar Borboev hamda qozog‘istonlik rejissyorlar Amina Ömirjan va Stepan Abramov tomonidan suratga olingan. Personajlarga qozog‘istonlik professional aktyorlar qozoq tilida ovoz bergan.
Loyiha ustida atigi 12 kishilik jamoa ishlagan. Ular generativ sun’iy intellektni an’anaviy qo‘lda chizilgan animatsiya bilan uyg‘unlashtirib, filmni ikki hafta ichida yakunlashga muvaffaq bo‘lgan. Higgsfield ma’lumotlariga ko‘ra, shunday hajmdagi animatsion filmni klassik usulda yaratish odatda 1–2 yil vaqt va 1–2 million dollar byudjet talab qiladi.
SIGGRAPH 2026 doirasida Higgsfield jamoasi NVIDIA sahnasida filmni yaratishda qo‘llangan AI pipeline’ni ham namoyish etdi. Kompaniya asoschisi va bosh direktori Alex Mashrabov sun’iy intellekt rassomlarni almashtirish uchun emas, balki kichik jamoalarga katta hajmdagi ijodiy loyihalarni amalga oshirish imkonini beruvchi vosita sifatida yaratilganini ta’kidladi.
«Kök Börü» generativ AI professional animatsiya ishlab chiqarishida qanday qo‘llanilishi mumkinligini namoyish etuvchi amaliy misollardan biri sifatida e’tibor qozondi. Shu bilan birga, loyiha Markaziy Osiyo madaniyati va folklorini global texnologiya hamjamiyatiga olib chiqqan ilk yirik AI animatsion filmlardan biri bo‘ldi.
