2026-yil 9–16-avgust kunlari Toshkent dunyoning eng kuchli yosh dasturchilarini bir joyga jamlaydi. Poytaxtda 38-Xalqaro Informatika Olimpiadasi — IOI 2026 bo‘lib o‘tadi. Bu nufuzli musobaqa tarixda ilk bor O‘zbekistonda tashkil etilmoqda.
Rasmiy ma’lumotlarga ko‘ra, olimpiyada 97 dan ortiq davlatdan 386 nafar maktab o‘quvchisi ishtirok etadi. Delegatsiyalar, hakamlar hay’ati va kuzatuvchilar bilan birga tadbir ishtirokchilari soni 900 nafardan oshishi kutilmoqda.
1989-yildan buyon o‘tkazib kelinayotgan IOI maktab o‘quvchilari uchun mo‘ljallangan eng nufuzli xalqaro dasturlash musobaqalaridan biri hisoblanadi. Har yili dunyoning eng kuchli yosh algoritmchilarini jamlaydigan olimpiadada ishtirokchilar murakkab algoritmik masalalarni cheklangan vaqt ichida dasturlash orqali yechish bo‘yicha bellashadi.
IOI 2026 O‘zbekiston uchun nafaqat yirik xalqaro ta’lim tadbiri, balki mamlakatning raqamli salohiyatini namoyish etish imkoniyati ham hisoblanadi. Musobaqaga mezbonlik qilish orqali O‘zbekiston o‘zining IT infratuzilmasi, yoshlar uchun yaratilayotgan imkoniyatlari va xalqaro texnologik hamkorlikka tayyorligini dunyoga namoyon etadi.
Musobaqa O‘zbekiston Respublikasi Raqamli texnologiyalar vazirligi boshchiligida, Maktabgacha va maktab ta’limi vazirligi, Fan olimpiadalari markazi hamda boshqa hamkor tashkilotlar ishtirokida tashkil etilmoqda.
So‘nggi yillarda O‘zbekiston xalqaro informatika olimpiadalarida o‘z natijalarini sezilarli yaxshilab bormoqda. Endilikda esa mamlakat nafaqat ishtirokchi, balki dunyoning eng nufuzli dasturlash musobaqasiga mezbon sifatida ham tarixga kiradi.
