Meta AI yo’nalishidagi navbatdagi muhim qadamini tashladi. Kompaniya avval AI startapi Atma Sciences jamoasini o’z safiga qo’shib, uning Gizmo texnologiyasidan foydalanish huquqini qo’lga kiritgan edi. Endi esa ushbu texnologiya asosida Pocket nomli yangi ilovani ishga tushirdi.
Pocket — foydalanuvchilarga matnli so’rov (prompt) orqali interaktiv AI tajribalari, mini-o’yinlar va boshqa «gizmo»larni yaratish imkonini beruvchi platforma. Meta «gizmo»ni AI yordamida yaratiladigan interaktiv va o’ynash mumkin bo’lgan tajriba sifatida ta’riflaydi. Foydalanuvchilar o’z ishlanmalarini boshqalar bilan ulashishi, boshqa foydalanuvchilar yaratgan kontentni sinab ko’rishi va ularni o’z xohishiga ko’ra qayta ishlashi mumkin.
Pocket an’anaviy chatbotlardan farq qiladi. Ilovada yaratilgan kontent foydalanuvchining teginishiga, telefon harakatiga javob bera oladi, ovoz va musiqadan foydalanadi, kamera hamda galereyadagi rasmlarni ishga sola oladi. Ayrim «gizmo»lar esa atrof-muhitni tahlil qilish imkoniyatiga ham ega.
Pocket’ning ishga tushirilishi Mark Zuckerberg ilgari ta’riflagan g’oyaga mos keladi. Unga ko’ra, kelajakda sun’iy intellekt shunchaki savollarga javob beruvchi vosita emas, balki odamlar yaratadigan, ulashadigan va birgalikda rivojlantiradigan interaktiv kontent platformasiga aylanishi kerak. Shu sabab Pocket’da foydalanuvchilar nafaqat AI yaratgan tajribalarni ko’radi, balki ularni tahrirlashi va yangi versiyalarini ham yaratishi mumkin.
Pocket Meta’ning AI ekotizimini kengaytirish strategiyasining bir qismi hisoblanadi. So’nggi oylarda kompaniya Meta AI, Vibes va boshqa AI mahsulotlarini taqdim etdi. Endi esa Pocket orqali AI’ni ijtimoiy tarmoq va mini-o’yinlar bilan birlashtirishni maqsad qilmoqda.
Hozircha Pocket barcha mamlakatlarda mavjud emas va bosqichma-bosqich ishga tushirilmoqda. Biroq ushbu loyiha Meta’ning sun’iy intellektni kundalik ijtimoiy tajribaning bir qismiga aylantirish yo’lidagi eng qiziqarli tashabbuslaridan biri bo’lishi mumkin.
