Sun’iy intellekt kompaniyasi Midjourney Gollivud studiyalari bilan davom etayotgan mualliflik huquqi bo’yicha sud ishida yangi talab bilan chiqdi. Kompaniya suddan Disney, Warner Bros. Discovery va Universal Pictures xodimlari Midjourney’dan qanday foydalangani haqidagi ma’lumotlarni taqdim etishni so’ramoqda.
Gap faqat studiyalar mualliflik huquqini buzgan deb ko’rsatgan tasvirlar haqida emas. Midjourney AI’ga yozilgan promptlar, yaratilgan tasvirlar va ichki ijodiy jarayonlarda AI qanday qo’llanilganiga oid hujjatlar ham ish uchun muhim ekanini ta’kidlamoqda.
Mojaro nimadan boshlangan edi?
2025-yilda Disney va Universal Midjourney ustidan sudga murojaat qilib, platforma foydalanuvchilarga oddiy matnli so’rov orqali mashhur qahramonlarning tasvirlarini yaratish imkonini berayotganini da’vo qilgan edi. Keyinchalik Warner Bros. ham ushbu da’voga qo’shildi.
Studiyalar fikricha, Midjourney ularning mualliflik huquqi bilan himoyalangan qahramonlarini ruxsatsiz yaratmoqda. Shu sababli ular har bir buzilgan mualliflik huquqi obyekti uchun 150 ming dollargacha tovon puli talab qilmoqda. Midjourney esa AI modellarini internetdagi tasvirlar asosida o’qitish AQSh qonunchiligidagi fair use tamoyiliga mos kelishini ta’kidlamoqda.
Sud avvalroq studiyalarga AI’dan foydalanish bo’yicha ayrim hujjatlarni taqdim etishni buyurgan. Biroq bu faqat tomoshabinlarga taqdim etilgan yakuniy mahsulotlarga tegishli bo’lgan. Midjourney esa bu yetarli emas, deb hisoblaydi. Kompaniya ichki storyboardlar, konsept-artlar, dastlabki eskizlar va AI yordamida yaratilgan boshqa materiallar ham oshkor qilinishi kerakligini so’ramoqda.
Agar studiyalar ham AI tizimlarini yaratish yoki rivojlantirish jarayonida mualliflik huquqi bilan himoyalangan materiallardan foydalangan bo’lsa, Midjourney bu holat butun industriya uchun odatiy amaliyot ekanini sudda ko’rsatishga urinadi.
Disney, Warner Bros. va Universal vakillari Midjourney talabini rad etmoqda. Ularning fikricha, kompaniya sud ishiga bevosita aloqasi bo’lmagan maxfiy ma’lumotlarni qo’lga kiritishga harakat qilmoqda.
Shuningdek, ular bu da’vo sun’iy intellekt texnologiyalariga qarshi emasligini, asosiy maqsad esa mualliflik huquqi bilan himoyalangan qahramonlarning ruxsatsiz yaratilishini to’xtatish ekanini ta’kidlamoqda.
Bu sud jarayoni faqat Midjourney va Gollivud studiyalari o’rtasidagi bahs emas. Qabul qilinadigan qaror generativ AI kompaniyalari qanday ma’lumotlarda modellarini o’qitishi mumkinligi, fair use tamoyili AI uchun qanchalik qo’llanishi va mualliflik huquqi qayerdan boshlanishiga oid muhim huquqiy mezonlarni belgilab berishi mumkin. Shu sababli bu ish nafaqat Midjourney, balki butun sun’iy intellekt sanoati diqqat bilan kuzatayotgan eng muhim sud jarayonlaridan biri hisoblanadi.
