Serbiya prezidenti Aleksandr Vuchich IT Park Uzbekistan faoliyati bilan tanishish maqsadida rasmiy tashrif bilan mamlakatimizga keldi. U yerda Prezident IT Park’ning asosiy yo‘nalishlari, yutuqlari va O‘zbekistonning raqamli transformatsiyasiga qo‘shayotgan hissasi haqida batafsil ma’lumot oldi. Tashrif davomida Serbiya delegatsiyasiga mamlakatda amalga oshirilayotgan raqamli islohotlar, IT Park’ning strategik tashabbuslari hamda istiqboldagi rejalar taqdim etildi. Mehmonlar sun’iy intellekt, raqamli texnologiyalar va innovatsion mahsulotlar yo‘nalishida ishlayotgan IT Park rezidentlarining loyihalari bilan yaqindan tanishdilar.
Delegatsiya e’tiborini UniconSoft, Didox (Venkon) va Kpi.com kabi kompaniyalarning ilg‘or texnologik yechimlari tortdi. Ularning mahsulotlari raqamlashtirish, biznes jarayonlarni avtomatlashtirish va ma’lumotlarni boshqarish sohalariga yo‘naltirilgan bo‘lib, xalqaro bozorlarga eksport qilish imkoniyatiga ega.
Shuningdek, UzSpace Agency tomonidan taqdim etilgan masofadan turib kuzatuv va fazoviy ma’lumotlarni qayta ishlash texnologiyalari Serbiya delegatsiyasining katta qiziqishiga sabab bo‘ldi.
UZINFOCOM kompaniyasi ham o‘zining Palm ID, Uzinfocom ekotizimi, HRM.argos.uz, uGaz va DMed kabi loyihalarini namoyish etdi. Ushbu yechimlar davlat boshqaruvi, sog‘liqni saqlash tizimi va fuqarolarga ko‘rsatiladigan xizmatlarni raqamlashtirishga qaratilgan bo‘lib, serbiyalik mutaxassislar tomonidan yuqori baholandi.
Prezident Aleksandr Vuchich IT Park’da yaratilgan zamonaviy infratuzilma va qulay muhitni e’tirof etib, bunday markazlar yoshlarni xalqaro loyihalarga jalb qilish hamda innovatsion g‘oyalarni ro‘yobga chiqarishda muhim rol o‘ynashini ta’kidladi.
Hamkorlikning yangi bosqichi — qo‘shma IT korxona va venchur fond
Tashrif doirasida IT Park Uzbekistan va UZINFOCOM vakillari Serbiya delegatsiyasi bilan uchrashuv o‘tkazib, raqamli texnologiyalar sohasidagi hamkorlikni yanada rivojlantirish masalalarini muhokama qildilar. Tomonlar Serbiyada qo‘shma IT korxona tashkil etish hamda Palm ID tizimini joriy etish bo‘yicha kelishuvga erishdilar. Shuningdek, 1 million dollarlik qo‘shma venchur fond tashkil etish rejalashtirilgan. Ushbu fond O‘zbekiston startaplarini Yevropa bozoriga, Serbiya startaplarini esa Markaziy Osiyo bozoriga olib chiqishga ko‘maklashadi.
O‘zbekiston tomoni server infratuzilmasiga investitsiya kiritish va Serbiyada tizimni texnik qo‘llab-quvvatlash uchun muhandislarni ishga jalb etishga tayyorligini bildirdi. Serbiya esa o‘z ichki bozorida ushbu texnologiyalarni joriy etish va keyinchalik Yevropa Ittifoqi bozoriga kengaytirishga tayyor ekanini tasdiqladi.
Kelgusidagi hamkorlik istiqbollari
Mazkur hamkorlik O‘zbekiston va Serbiya o‘rtasidagi texnologik aloqalarni yangi bosqichga olib chiqadi. Yaqin istiqbolda tomonlar quyidagi yo‘nalishlarda hamkorlikni kengaytirishni rejalashtirmoqda:
- IT-autsorsing va KPO xizmatlarini rivojlantirish;
- qo‘shma ta’lim va akseleratsiya dasturlarini yo‘lga qo‘yish;
- xalqaro venchur fondlar va akseleratorlar bilan hamkorlikni kuchaytirish;
- texnologik startaplarni xalqaro bozorlarga olib chiqish.
Bu tashabbuslar O‘zbekiston va Serbiya IT kompaniyalarining raqobatbardoshligini oshirish, innovatsiyalarni qo‘llab-quvvatlash hamda ularning global texnologiya bozorida faol ishtirok etishiga xizmat qiladi.
