O‘zbekistonda moliya bozori yana bir yirik yangilik arafasida — mamlakatda yangi bank tashkil etish tashabbusi ilgari surildi. Bu haqda Investitsiyalar, sanoat va savdo vazirligi matbuot xizmati xabar berdi. 28 noyabr kuni vazir Laziz Kudratov UzOman bosh direktori Omar Bahram bilan uchrashib, moliyaviy hamkorlikni kengaytirish istiqbollarini muhokama qildi. Uchrashuvda xorijiy hamkorlar bilan birgalikda yangi bank ochish tashabbusi asosiy mavzulardan biri bo‘ldi.
Tomonlar loyiha doirasida:
- tashkiliy masalalar,
- tartibga solish (regulyator) talablari,
- barcha bosqichlarni izchil va puxta ishlab chiqish zarurligiga alohida e’tibor qaratishdi.
UzOman haqida qisqacha
Rasmiy ma’lumotlarga ko‘ra, UzOman 2010 yilning fevral oyida tashkil etilgan bo‘lib, uning ustav kapitali 256 million AQSh dollarini tashkil etadi. Kompaniya bozor kon’yunkturasini o‘rganish va investitsion tahlil bilan shug‘ullanadi. Uning asosiy ta’sischilari — O‘mon Investitsiya Agentligi (75%) va O‘zbekiston Tiklanish va taraqqiyot jamg‘armasi (25%).
O‘zbekistonda banklar soni va islom bankchiligi istiqboli
Ayni paytda mamlakatda 35 ta klassik bank va 1 ta mikrobank faoliyat yuritmoqda. Yaqinda Oliy Majlis Qonunchilik palatasi islom bankchiligi to‘g‘risidagi qonun loyihasini qabul qildi. Ushbu hujjat hozirda Senat ko‘rib chiqishiga yuborilgan.
Shuningdek, O‘zbekiston Markaziy banki raisi o‘rinbosari Abrorxo‘ja Turdaliev 2030 yilga qadar mamlakatda kamida 10 ta islom banki ochilishi rejalashtirilayotganini ma’lum qilgan. Bundan tashqari, uchta davlat banki “islomiy oyna” (Islamic window) tizimini joriy etadi.
Regulyator bu yo‘nalishni soya iqtisodiyotidagi mablag‘larni bank tizimiga jalb qilishning muqobil mexanizmi sifatida ko‘rmoqda.
Xorijiy investorlar ham qiziqmoqda
Yangi islom banki tashkil etish bo‘yicha Noor Financial Investment Company ham O‘zbekistonga qiziqish bildirgan. Bu esa mamlakat bank sektorining xalqaro miqyosda tobora jozibadorlik kasb etayotganini ko‘rsatadi.
