Startap Nozomio asoschisi Arlan Raxmetjanov pre-seed bosqichida 1 million dollar investitsiya jalb qilishga muvaffaq bo‘ldi. Qizig‘i shundaki, sarmoya kiritmoqchi bo‘lganlar kerakli miqdordan ancha ko‘p edi.
Investitsiya raundi 18 yoshli yigitning Londonga yetib kelganidan atigi besh kun o‘tib yopildi. Arlan Buyuk Britaniyaga Entrepreneurs First akseleratoriga qo‘shilish uchun keldi va buning uchun maktabni bitirish arafasida o‘qishni tashlashga qaror qildi.
Nozomio dasturchilar uchun mo‘ljallangan platforma yaratmoqda. Bu platforma AI-agentlarni ishga tushirish va ularni boshqarishni osonlashtiradi. Ular mustaqil ravishda kodni tushunishi, so‘rov asosida vazifalarni bajarishi va kundalik ish jarayonlarini tezlashtirishi mumkin. Nozomio’ning birinchi agenti Nia deb ataladi — bu har qanday kod bazasi uchun mo‘ljallangan sun’iy intellekt muhandisi bo‘lib, loyiha tuzilmasini anglaydi va texnik savollarga javob bera oladi.
Raundning asosiy investori Yevropaning eng muvaffaqiyatli venchur fondlaridan biri — LocalGlobe bo‘ldi. Ushbu fond o‘z portfelida Figma, Revolut, Wise va Robinhood kabi unicorn kompaniyalarni jamlagan. Shuningdek, loyihaga Eurasian Hub Ventures venchur klubining asoschisi Nurdaulet Bazilbekov ham sarmoya kiritdi va Nozomioning strategiya va fandraizing bo‘yicha maslahatchisi sifatida qo‘shildi.
“Investitsiya raundiga qiziqish 1 million dollardan oshib ketdi, lekin bu katta ulushni berishni anglatardi. Natijada, hatto Sequoia Capital skautlaridan biriga ham muloyimlik bilan rad javobini berishga to‘g‘ri keldi. Men endigina Londonga uchib kelgan edim, LinkedIn’da maktabni tashlab, bu yerga ko‘chib kelganim haqida post yozdim — va hammasi shu yerda boshlandi. Investorlar o‘zlari bog‘lana boshlashdi,» — deydi Arlan.
Bazilbekovning ta’kidlashicha, Arlanning hikoyasi hattoki rivojlangan G‘arb ekotizimlari uchun ham misli ko‘rilmagan holat bo‘ldi:
“Fandraizing boshlanganidan atigi ikki kun o‘tib, Londondagi barcha yetakchi investorlar Arlanni tanib bo‘lishdi. Men Qozog‘istondan chiqqan muvaffaqiyatli startapchilarni bilaman — Remofirst, Causaly, DNA Payments — lekin bu ilk bor shunday holatki, kimdir endigina kelib, butun industriyaning e’tiborini jalb qildi. Bu voqea shuni ko‘rsatadiki, mintaqamizdagi asoschilar boshidanoq global miqyosda fikrlashi va xorijda qo‘llab-quvvatlashga erishishi mumkin.»
Raund startaplar uchun odatiy bo‘lgan SAFE (Simple Agreement for Future Equity) shartnomasi asosida rasmiylashtirildi. Bu soddalashtirilgan investitsiya shakli bo‘lib, startap hozir pul oladi, investorlar esa kompaniya bahosi aniqlangandan so‘ng ulushga ega bo‘lishadi.
Arlan jalb qilingan mablag‘ni backend dasturchilarini yollash, texnik infratuzilmani kengaytirish va San-Fransiskoga ko‘chib o‘tishga yo‘naltirishni rejalashtirmoqda.
