Oliy Majlis Qonunchilik palatasi to‘lov tizimlari va tashkilotlari faoliyatini yanada tartibga solishga qaratilgan qonun loyihasini ikkinchi va uchinchi o‘qishda qabul qildi. Bu bilan moliyaviy xavfsizlikni ta’minlash va raqamli to‘lovlarda firibgarlikning oldini olish maqsad qilinmoqda.
Yangi qonun bilan quyidagi o‘zgarishlar joriy etiladi:
- Tavakkalchiliklarni boshqarish tizimi — barcha to‘lov tizimi operatorlari bu tizimni joriy etishi shart bo‘ladi.
- Muhim to‘lov tashkiloti tushunchasi qonunchilikka kiritiladi. To‘lov tashkilotlari faoliyat ko‘lami asosida toifalarga ajratiladi.
- Markaziy bank vakolati kengayadi — u to‘lov tashkilotlarining xavf boshqaruvi bo‘yicha minimal talablarni belgilaydi.
- Antifrod va texnik himoya vositalari — tashkilotlar onlayn xizmatlarda antifrod tizimlar va ilg‘or texnik himoya mexanizmlarini joriy etishi kerak bo‘ladi.
Qonun “Markaziy bank to‘g‘risida”, “To‘lovlar va to‘lov tizimlari to‘g‘risida” kabi bir nechta hujjatlarga o‘zgartish kiritishni nazarda tutadi. Bu o‘zgarishlar ijtimoiy injiniring, kiberjinoyatlar va noqonuniy tranzaksiyalar bilan kurashishni maqsad qilgan.
Aprel oyida to‘lovlar ustidan nazorat kuchaytirilgan edi: 11,25 mln so‘mdan yuqori tranzaksiyalar uchun jo‘natuvchining shaxsiy ma’lumotlari talab qilinmoqda.
Qonun loyihasi 2023-yil kuzida raqamli jinoyatchilikka qarshi kurash bo‘yicha prezident qarori bilan bog‘liq yondashuvlarning mantiqiy davomidir.
