Toshkent, O‘zbekiston — 2025-yil 21 avgust— TBC Bank Group (TBC PLC), Gruziyadagi yetakchi moliyaviy xizmatlar ekotizimlari va London fond birjasida ro‘yxatga olingan O‘zbekistondagi eng yirik raqamli banking ekotizimi operatori, O‘zbekistonda onlayn e’lonlar bozori yetakchisi bo‘lmish OLX Uzbekistan (“OLX UZ”) aksiyalarining nazorat paketini sotib olganini e’lon qiladi. Sotuvchi Prosus tarkibiga kiruvchi OLX Group bo‘ldi.
Texnologiya sohasiga sarmoya kiritayotgan dunyodagi eng yirik o‘yinchilardan biri bo‘lmish Prosus bilan tuzilgan bitim TBC Uzbekistanga OLX UZ orqali yangi mijoz segmentlariga kirish imkonini beradi — bu O‘zbekistondagi eng ko‘p tashrif buyuriladigan 6-sayt. OLX Uzbekistan oyiga 5,4 million faol foydalanuvchi va 2,2 million joriy e’longa ega. Xizmatlar, tovarlar, avtomobillar va ko‘chmas mulk savdosi uchun ushbu yetakchi sayt mamlakatning faol internet auditoriyasining 20 foizdan ortig‘ini qamrab oladi. Bitim O‘zbekistonning tez rivojlanayotgan texnologik sektori uchun muhim voqea bo‘ldi va so‘nggi 30 yil ichida eng yirik qo‘shilish va sotib olishlar qatoriga kirdi.
OLX UZ’ni sotib olish uchun TBC Bank Group Titan Investments bilan qo‘shma korxona (QK) tashkil etdi — bu dunyoning yetakchi institutsional investorlari, oilaviy sarmoyalarni boshqarish kompaniyalari va Yaqin Sharq suveren fondlari bilan ishlaydigan xalqaro investitsiya holding kompaniyasidir. Qo‘shma korxona OLX Uzbekistan aksiyalarining 100 foizini sotib oladi, TBC Bank Group esa 50 foiz + 1 aksiyaga, Titan Investments esa qolgan ulushga egalik qiladi. Shartnoma kerakli tartibga solish ruxsatnomalarini olgandan keyin yakunlanishi kerak. TBC Bank Group daromadli o‘sib borayotgan OLX Uzbekistanni TBC Uzbekistan ekotizimiga integratsiya qilishni rejalashtirmoqda.
OLX Uzbekistan o‘z brendi ostida faoliyatini davom ettiradi.
TBC PLC va Titan Investments o‘rtasidagi qo‘shma korxona hamkorlarning noyob tajribasi va raqamli banking va onlayn e’lon xizmatlarini rivojlantirish bo‘yicha muvaffaqiyatli tajribasini birlashtiradi. Titan Investments jamoasi tez rivojlanayotgan raqamli kompaniyalarni, shu jumladan onlayn reklama platformalarini rivojlantirish va kengaytirish uchun noyob investitsiya tajribasiga ega. Qo‘shma korxonani tashkil etish TBC Bank Group kompaniyasiga Titan kompetentsiyalaridan foydalanish imkoniyatini beradi va TBC Uzbekistanga raqamli bank mahsulotlarini OLX Uzbekistanga integratsiyalashga va yangi yechimlarni birgalikda ishlab chiqishga e’tibor qaratish imkonini beradi.
Bitim TBC Groupning daromadli o‘sish strategiyasiga mos keladi va 21 million noyob ro‘yxatdan o‘tgan foydalanuvchilar bilan Markaziy Osiyodagi raqamli bankingning yetakchi ekotizimi bo‘lmish TBC Uzbekistan uchun qo‘shimcha sinergiya imkoniyatlarini yaratadi. Avvalroq, iyun oyida TBC Bank Group chakana savdoni avtomatlashtirish uchun SaaS platformasi bo‘lgan BILLZ aksiyalarining nazorat paketini sotib olganini e’lon qildi, bu esa O‘zbekistondagi TBC mahsulot qatorini yanada kengaytiradi va diversifikatsiya qiladi.
Nika Kurdiani, CEO TBC Uzbekistan: “Bizning ekotizim 21 million noyob foydalanuvchini, ya’ni O‘zbekiston aholisining yarmidan ko‘pini birlashtiradi. Biz mijozlarga moliyaviy va kundalik muammolarni yagona, qulay interfeys orqali hal qilishda yordam berib, dinamik o‘sishda davom etmoqdamiz. Mamlakatning yetakchi onlayn e’lonlar platformasi OLX Uzbekistan’ni sotib olish kengayish va diversifikatsiya strategiyasidagi mantiqiy qadamdir: biz yangi mijozlarni jalb qilmoqdamiz, qo‘shimcha segmentlarga kirib auditoriya e’tiborini ulushini oshirmoqdamiz. Bizning platformalarimiz o‘rtasidagi sinergiya yangi foydalanuvchilar uchun eng yaxshi raqamli bank yechimlarini yaratishni tezlashtiradi. Biz Titan Investments bilan hamkorlik qilishdan xursandmiz va ularning onlayn e’lonlar xizmatlarini kengaytirish tajribasini qadrlaymiz. Bizning maqsadimiz OLX salohiyatini ochib berish, platformaning yanada dinamik o‘sishini ta’minlash va kelajakda uni TBC Uzbekistan ekotizimiga to‘liq integratsiya qilishdir”.
TBC Uzbekistan TBC Bank Group (80%), YETTB (10%) va XMK (IFC) (10%) birgalikda egalik qiladigan TBC Digital kompaniyasi tomonidan boshqariladi. TBC Bank Group kompaniyasining bitim bo‘yicha eksklyuziv maslahatchisi TBC Capital bo‘ldi.
