Saudiya Arabistonining yetakchi dam olish uylarini ijaraga berish platformasi Gathern $72 million dollar hajmidagi B seriya investitsiya raundini yopdi. Sarmoyaga Sanabil Investments (Saudiya Arabistonning Davlat investitsiya jamg‘armasiga to‘liq tegishli kompaniya) boshchilik qildi. Raundda STV, Pinnacle Capital, Nuwa Capital va Endeavor Catalyst fondlari ham qatnashdi. Bitimdan keyin kompaniya qiymati 266 million dollardan ortiq bo‘ldi.
Gathern shu tariqa mintaqada ayol tomonidan asos solingan va boshqarilayotgan eng yuqori qiymatga ega venchur-startap sifatida e’tirof etildi. Kompaniya yangi mablag‘larni yaqin kelajakda Tadawul fond birjasida IPO o‘tkazishga tayyorgarlik uchun yo‘naltirishini ma’lum qildi.
Qanday boshlangan?
2016-yilda Latifah Altamimi tomonidan chaletlarni bron qilish servisi sifatida yo‘lga qo‘yilgan Gathern bugunga kelib Saudiya Arabistonida alternativ mehmondo‘stlik bozorining yetakchisiga aylandi. Platforma orqali qisqa muddatli uy-joy ijaralari, ba’zi shaharlarda esa uzoq muddatli ijara imkoniyati ham mavjud.
Bugungi kunda kompaniya:
- 72 mingdan ortiq uy-joy va dam olish maskanlarini taklif etadi;
- alternativ mehmondo‘stlik bozorida 44% ulushga, poytaxt Ar-Riyodda esa 53% ulushga ega;
- 9 yil ichida mahalliy iqtisodiyotga $533 million dollardan ortiq mablag‘ kiritgan;
- 33 mingdan ortiq saudiyalik xostlarga barqaror daromad manbai yaratgan;
- foydalanuvchilar soni 5 milliondan oshgan, ular 150 mamlakatdan.
Yangi mablag‘lar nimalarga sarflanadi?
Kompaniya ta’kidlashicha, bu kapital quyidagi yo‘nalishlarda ishlatiladi:
- Saudiya va mintaqaviy bozorni kengaytirish;
- kelayotgan sayyohlar va uzoq muddatli ijara talabiga xizmat ko‘rsatish;
- Vision 2030 doirasida Saudiya Arabistonini global turizm markaziga aylantirish;
- sun’iy intellekt asosidagi yechimlar bilan foydalanuvchi tajribasini yaxshilash;
- yangi xostlarni jalb qilish va tarmoqni kengaytirish.
Avvalgi investitsiyalar
Gathern 2021-yilda STV boshchiligida $6 million dollarlik A seriya investitsiya olgan, 2022-yilda esa oldindan B seriya (pre-B) raundini yopgan edi.
Nega bu muhim?
Saudiya Arabistoni turizm va raqamli iqtisodiyot bozorini kengaytirish yo‘lida faol ishlamoqda. Gathernning tezkor o‘sishi va IPOga tayyorgarligi mamlakatning ayollar asos solgan startaplarini qo‘llab-quvvatlashdagi yangi davrni ham, alternativ mehmondo‘stlik bozorining jadal rivojlanishini ham aks ettiradi.
