2025-yil 25-iyun kuni Tojikistonning Darvoz tumanida Markaziy Osiyodagi ilk Sun’iy intellekt (AI) milliy klasteri va Area AI texnoparkining tantanali ochilish marosimi bo‘lib o‘tdi. Tadbirda Tojikiston Respublikasi Prezidenti Emomali Rahmon ishtirok etdi.
Loyiha Tojikiston sanoat vazirligi huzuridagi Sun’iy intellekt kengashi va mahalliy Darya.ai kompaniyasi tomonidan ishlab chiqilgan. Klaster quyidagi yo‘nalishlarga e’tibor qaratadi:
- Tojik tilidagi AI til modellari;
- Hisoblash infratuzilmasi;
- Amaliy tadqiqotlar va tajriba loyihalari.
Area AI texnoparki sun’iy intellekt sohasidagi ilmiy izlanishlar, xalqaro hamkorlik va pilot yechimlarni sinovdan o‘tkazish uchun platforma bo‘lib xizmat qiladi. AI texnologiyalari energetika, sog‘liqni saqlash, ta’lim va davlat xizmatlari sohalarida joriy etilishi rejalashtirilgan.
Mazkur tashabbus Tojikistonning Milliy sun’iy intellekt strategiyasi doirasida amalga oshirilmoqda. Strategik rejaga ko‘ra, 2040-yilga borib AI texnologiyalarining mamlakat YAIMidagi ulushi 5% dan oshishi kutilmoqda.
Hamkorlar:
- 🇦🇪 ATRC (BAA) — Tojik–arab til modellarini yaratish va mintaqaviy AI loyihalar;
- 🇦🇪 Presight AI — Davlat xizmatlari, aqlli shaharlar va kiberxavfsizlik uchun AI yechimlar;
- 🇺🇸 Scale AI — Tojikcha AI modellarni rivojlantirish va sanoatlashtirish.
Tadbirda OpenAI, NVIDIA, G42, Mistral, Qatar National Bank va boshqa yetakchi xalqaro kompaniyalar vakillari ishtirok etdi.
📌 Tojikistonning bu tashabbusi sun’iy intellekt bo‘yicha mintaqaviy raqobatning yangi bosqichiga zamin yaratmoqda.
Fikr bildirish