O‘zbekistonning eng yirik raqamli ekotizimlaridan biri — Uzum — AQShning investitsiya kompaniyasi VR Capitaldan 300 mlrd so‘m (taxminan $25 mln) miqdorida yangi investitsiya jalb qildi. Ushbu mablag‘ kompaniyaning fintex yo‘nalishidagi agressiv o‘sish strategiyasini yanada tezlashtiradi.
Bu Uzumning 2025-yildagi ikkinchi yirik investitsiya jalb qilishi hisoblanadi. Avgust oyida kompaniya Tencent Holdings (WeChat egasi) va VR Capital’dan $70 mln investitsiya olgan edi. O‘sha raunddan so‘ng ekotizimning baholanishi 1,5 mlrd dollarga yetgan.
Fintex — Uzumning navbatdagi asosiy o‘sish drayveri
Yangi investitsiya Uzumning fintex infratuzilmasini yanada kuchaytirishga yo‘naltiriladi. Mablag‘ quyidagi yo‘nalishlarga sarflanadi:
- ilg‘or raqamli bank xizmatlarini joriy etish,
- to‘lov infratuzilmasini modernizatsiya qilish,
- iste’mol kreditlari mahsulotlarini tezlashtirilgan tarzda kengaytirish.
Kompaniyaga ko‘ra, fintex yo‘nalishi ekotizim ichida foydalanuvchi faolligini va platformalararo integratsiyani eng tez oshirayotgan segment hisoblanadi.
Tashabbuskorning fikri
Uzum asoschisi va bosh direktori Jasur Jumayev yangi investitsiyaning strategik ahamiyatini ta’kidladi:
“Bu investitsiya bizga raqamli bank, to‘lovlar va kredit mahsulotlarini yanada tez rivojlantirish imkonini beradi — bu nafaqat Uzum ekotizimini, balki mamlakat iqtisodiyotining raqamli transformatsiyasini ham kuchaytiradi. Mablag‘ning milliy valyutada taqdim etilgani esa so‘mning xalqaro hisob-kitoblardagi rolining oshib borayotganini ko‘rsatadi.”
Uzum o‘zini O‘zbekistonning eng yirik raqamli platformasi sifatida rivojlantirishni davom ettirmoqda. Ekotizim onlayn savdo, raqamli va an’anaviy bank xizmatlari hamda fintexni yagona platformada birlashtiradi. Kompaniya auditoriyasi hozirda 20 milliondan ortiq foydalanuvchini tashkil etadi.
Global rejalari: Eurobond va IPO
Kompaniya yaqin yillarda bir nechta yirik xalqaro moliyaviy tashabbuslarni amalga oshirishni rejalashtirmoqda:
- 2026-yil birinchi yarmida Uzum o‘zining $300 mln miqdoridagi ilk Eurobondini xalqaro bozorga joylashtirishni rejalashtirgan.
- 2027-yilda esa kompaniya xalqaro IPOga chiqishni mo‘ljallagan. Ko‘rib chiqilayotgan maydonlar: Nasdaq (AQSh), Abu-Dabi, Gonkong va London.
Kompaniya IPO’ni chet elda o‘tkazishni “likvidlik va xalqaro investorlar bazasiga kengroq kirish” bilan izohlagan. Shuningdek, avvalroq Uzum tomonidan 400 mlrd so‘mlik ikkinchi obligatsiya emissiyasi rejalashtirilgani haqida xabar berilgan edi.
