Geyming bozori yirik o‘zgarishlar ostonasida turibdi. Microsoft korporatsiyasining o‘yin bo‘limi — Xbox o‘z tarixidagi eng yirik tarkibiy islohotni boshladi. Xbox bosh ijrochi direktori (CEO) Asha Sharma xodimlarga yo‘llagan ichki xatida platformaning moliyaviy barqarorligini ta’minlash uchun qiyin qarorlar qabul qilinganini ma’lum qildi.
Ushbu optimallashtirish jarayonida 2027-moliyaviy yil yakuniga qadar jami 3 200 ta ish o‘rni qisqartiriladi. Birinchi to‘lqinning o‘zida Xbox tarkibidan 1 500 nafar xodim bo‘shatilishi kutilmoqda.
Asha Sharmaning qayd etishicha, hozirgi bozor sharoitida va boshqaruv tizimining haddan tashqari murakkabligi sababli Xbox Game Studios bo‘limi kiritilgan har bir dollar investitsiyadan 64 sent zarar ko‘rmoqda. Studiyalar va oliy rahbariyat o‘rtasida 14 tagacha boshqaruv bo‘g‘inlari (layers) mavjud bo‘lgani qaror qabul qilish jarayonini sekinlashtirgan va xarajatlarni oshirib yuborgan. Shu sababli, kompaniya o‘rta bo‘g‘in menejerlarini qisqartirib, asosiy e’tiborni konsol foydalanuvchilariga qaratishga qaror qildi.
To‘rtta mashhur studiya Xbox tarkibidan chiqmoqda
Kompaniya studiyalarni butkul yopish o‘rniga, ularning faoliyatini va ishlab chiqilayotgan o‘yinlarni saqlab qolish uchun ularni mustaqil boshqaruvga topshirish yoki sotish yo‘lini tanladi. Hozircha birorta ham rasman e’lon qilingan loyiha bekor qilinmagan.
- Compulsion Games (South of Midnight o‘yini yaratuvchisi) ichki rahbariyat tomonidan sotib olinadi va yana mustaqil studiyaga aylanadi.
- Double Fine Productions (Tim Sheyfer boshchiligida) mustaqillikni qo’lga kiritadi.
- Undead Labs va Ninja Theory esa yangi noshirlar (publisher) tarkibiga o‘tadi.
- Muhim loyihalar: Insayderlarning ta’kidlashicha, Ninja Theory’ning yangi loyihasi va Undead Labs tomonidan ishlab chiqilayotgan State of Decay 3 o‘yinlarini yaratish jarayoni to‘xtatilmaydi.
Arkane Lyon studiyasi va ularning Blade loyihasi taqdiri esa hozircha noaniq bo‘lib turibdi. Microsoft ushbu studiyani yopilishdan saqlab qolish va loyihani davom ettirish uchun Fransiya hukumati bilan muzokaralar olib bormoqda.
Yangi strategiya
Xbox rahbariyati endi tarqoq va kichik hajmdagi eksperimental loyihalardan ko‘ra, bozorda o‘z o‘rniga ega bo‘lgan yirik brendlarga e’tibor qaratadi.
- Boshqaruv tizimini soddalashtirish: Minecraft va King studiyasining Candy Crush loyihalari to‘g‘ridan-to‘g‘ri Xbox oliy rahbariyatiga bo‘ysundiriladi. Maqsad — Roblox va Monopoly Go kabi raqobatchilarga qarshi tezkor operatsion qarorlar qabul qilish.
- Yirik brendlar ustuvorligi: Kompaniya Halo va Fallout kabi yetakchi franshizalarga ko‘proq resurs ajratadi. Hatto Obsidian studiyasi yangi Fallout o‘yini ustida ish boshlashi mumkinligi taxmin qilinmoqda.
- Texnik qurilmalar (Hardware) bo‘limi saqlab qolinadi: Ma’lum bo‘lishicha, eng kam qisqartirish apparat ta’minoti bo‘limida ro‘y beradi. Microsoft keyingi avlod Xbox Helix konsolini chiqarish rejasidan voz kechmagan, garchi global bozordagi yarimo‘tkazgichlar va xotira modullari taqchilligi loyiha tannarxiga salbiy ta’sir ko‘rsatayotgan bo‘lsa-da.
«Bu o‘zgarishlar Xbox’ning kichrayishi emas, balki uning yirikroq kelajagini ta’minlashga qaratilgan. Biz geyming industriyasiga har qachongidan ko’proq, biroq yuqori intizom va aniq fokus bilan investitsiya kiritamiz.»
— Asha Sharma, Xbox CEO
Windows Central ekspertlarining fikricha, Xbox uzoq vaqtdan beri tizimli inqirozlar ichida yashamoqda. Microsoft’ning eng katta xatolaridan biri — media-trendlarni vaqtida tijoriylashtira olmaganidir. Masalan, geymerlar o‘rtasida katta qiziqish uyg‘otgan Fallout seriali ekranlarga chiqqanida, uni qo‘llab-quvvatlaydigan yangi asosiy o‘yin tayyor bo‘lmagan.
Minglab mutaxassislarning ishdan bo‘shatilishi industriya xodimlari uchun og‘ir zarba bo‘lsa-da, brendning salohiyatini saqlab qolish uchun ushbu tarkibiy islohotlar zaruriy chora sifatida ko‘rilmoqda.
