Yettita davlat banki tomonidan tashkil etilgan “United Ventures” qo‘shma investitsiya fondi istiqbolli startap loyihalarni moliyaviy qo‘llab-quvvatlash va ekotizimni rivojlantirish maqsadini ko‘zlamoqda.
Korxona va tashkilotlarning yagona davlat reestri ma’lumotlariga ko‘ra, “United Ventures” kompaniyasi 2025-yilning 27-yanvarida ro‘yxatdan o‘tgan. Ustav kapitali 525 mlrd so‘m (Markaziy bank kursi bo‘yicha $40,51 mln) bo‘lib, kompaniyaga Azizbek Qurbonov rahbarlik qiladi. Qurbonov ilgari “Sug‘urta Bozor” startapining hammuassisi bo‘lgan.
Fond ta’sischilari
“United Ventures” ta’sischilari orasida “Asakabank”, “Mikrokreditbank”, “O‘zmilliybank”, “Xalq banki”, “Biznesni rivojlantirish banki”, “Turonbank” va “Agrobank” bor. Har bir bank kompaniyaning 14,28% ulushiga ega.
Fondning maqsadi
Azizbek Qurbonov o‘zining LinkedIn sahifasida yangi lavozimi haqida ma’lum qilib, fondning asosiy maqsadlarini quyidagicha izohladi:
Mahalliy startaplarga investitsiya kiritish;
Strategik moliyalashtirishni yo‘lga qo‘yish;
Inkubatsiya va akseleratsiya dasturlari yordamida startap ekotizimini rivojlantirish.
Qurbonov fondning rejalari haqida yaqin haftalarda batafsil ma’lumot berishni va akseleratsiya dasturlari tashkilotchilarini hamkorlikka taklif qilishini bildirdi.
Venchur ekotizimni rivojlantirish bo‘yicha tashabbuslar
2024-yilning dekabr oyida “IT Park” ham $10 mlnlik venchur fondi — “IT Park Ventures”ni ishga tushirgandi. Ushbu fond sun’iy intellekt, fintech, yashil texnologiyalar va geymdev yo‘nalishlariga sarmoya kiritishni maqsad qilgan.
Avvalroq, O‘zbekiston Prezidenti Shavkat Mirziyoyev raisligida o‘tkazilgan yig‘ilishda davlat banklariga bittadan venchur kompaniya ochish va mahalla startaplarini rivojlantirish uchun jami $50 mln ajratish topshirilgandi. Shu bilan birga, startaplarni biznesga aylantiruvchi akseleratorlar tashkil etish zarurligi ham ta’kidlangan edi.
Yangi tashkil etilgan “United Ventures” ushbu tashabbuslarning amaliy ifodasi bo‘lib, O‘zbekistonning innovatsion startap ekotizimini rivojlantirishga hissa qo‘shishi kutilmoqda.
Fikr bildirish