Kompaniya ushbu qaror ustidan shikoyat qilmoqchi.
Yevropada Yango xizmatini boshqaruvchi MLU B.V. kompaniyasi ilova foydalanuvchilarining shaxsiy ma’lumotlarini Rossiyaga uzatgani uchun 100 million yevro jarimaga tortildi. Bu haqda Finlandiya Ma’lumotlarni himoya qilish bo‘yicha vakil idorasiga tayanib «Yle» nashri xabar bermoqda.
Xabarda aytilishicha, qaror Niderlandiya, Finlandiya va Norvegiya ma’lumotlarni himoya qilish boshqarmalari tomonidan birgalikda qabul qilingan.
MLU B.V. — bu «Yandex» va «Uber»ning Niderlandiyada ro‘yxatdan o‘tgan sobiq qo‘shma korxonasidir (RBC aniqlik kiritishicha). Tergov harakatlari 2023-yildan beri olib borilgan: mutaxassislar Yango Finlandiya va Norvegiya foydalanuvchilari ma’lumotlarini Rossiyaga uzatayotgani va shaxsiy ma’lumotlar himoyasi qay darajada ta’minlanayotganini tekshirishgan.
MLU B.V. vakillarining so‘zlariga ko‘ra, kompaniya «Yevropa qonunchiligiga muvofiq barcha zarur himoya choralariga rioya qilgan» va shaxsiy ma’lumotlarni YeI hududida shifrlangan holatda saqlagan. Shuningdek, ular Yango 2025-yildan beri Norvegiya va Finlandiyada faoliyat yuritmayotganini alohida ta’kidlashgan.
Niderlandiyaning Yandex N.V. kompaniyasi 2024-yil yozida Rossiyadagi «Yandex» aktivlarini sotish bo‘yicha kelishuvni yakunladi va o‘z nomini Nebius deb o‘zgartirdi. Hozirda u sun’iy intellekt infratuzilmasini yaratish bilan shug‘ullanmoqda va Toloka (ma’lumotlarni belgilash), Avride (uchuvchisiz transportlar) hamda TripleTen (ta’lim xizmatlari) loyihalarini rivojlantirmoqda. Taksi biznesi esa Rossiyaning «MKAO Yandex» kompaniyasi tarkibida qolgan.
