Google real vaqt rejimida ovozli muloqot qilishga mo‘ljallangan Gemini 3.8 Live va murakkab vazifalar uchun Gemini 3.8 Live Extended Thinking modellarini taqdim etdi.
Yangi modellar suhbatni tabiiyroq qilishga qaratilgan. Gemini foydalanuvchi gapini bo‘lib yuborsa, suhbatni moslashtira oladi, 97 ta tilni qo‘llab-quvvatlaydi va kamera orqali ko‘rsatilgan obyektlarni tahlil qiladi.
Masalan, foydalanuvchi buzilgan velosiped qismini kamerada ko‘rsatsa, Gemini muammoni aniqlab, nima qilish kerakligini ovoz orqali tushuntirishi mumkin.
Extended Thinking versiyasi esa suhbat davomida murakkab, ko‘p bosqichli vazifalarni bajarishga mo‘ljallangan. Masalan, foydalanuvchi bilan gaplashgan holda tadbir rejasini tuzishi mumkin.
Gemini 3.8 Live Extended Thinking Artificial Analysis’ning Speech-to-Speech Quality Index reytingida 82,6 ball bilan birinchi o‘rinni egalladi. Model OpenAI va xAI’ning ovozli modellaridan yuqori natija qayd etgan. Gemini 3.8 Live hozirda dasturchilar uchun Gemini API va Google AI Studio orqali mavjud.
