Yangi versiya bir martalik so‘rovlardan ko‘ra, bir necha bosqichdan iborat murakkab vazifalarni uzoq vaqt davomida mustaqil bajarishga yo‘naltirilgan. Grok 4.6 noma’lum kod bazasini o‘rganish, dastur yaratish, ma’lumotlarni tahlil qilish, tadqiqot olib borish va loyihani bir necha bosqichda takomillashtirish kabi vazifalarni bajarishi mumkin.
Modelning asosiy yangiliklaridan biri — o‘z ishini tekshirish va xatolarni tuzatish qobiliyati. xAI ma’lumotlariga ko‘ra, Grok 4.6 uzoq davom etadigan vazifalarda natijalarini tekshiradi, muammolarni aniqlaydi va keyingi bosqichga o‘tishdan oldin ularni tuzatishga harakat qiladi.
Benchmarklarda ham yangi model kuchli natijalarni ko‘rsatgan. Grok 4.6 Artificial Analysis Intelligence Index’da 61 ball to‘plab, GPT-5.6 Sol bilan bir xil natijani qayd etdi. DeepSWE 1.1 testida 65,9%, CursorBench v3.2’da esa 69,9% natija ko‘rsatdi.
Grok 4.6 ayniqsa dasturlash, web-development va AI-agentlar bilan ishlashga yo‘naltirilgan. xAI modelni kengroq loyihalar uchun sinab ko‘rganini, jumladan, g‘oyadan ishlaydigan dastur prototipigacha bo‘lgan jarayonni bir necha bosqichda bajarishini ta’kidlamoqda.
Model hozirda Grok Build va Cursor’da mavjud bo‘lib, API orqali ham foydalanish mumkin. Narxi 1 mln input token uchun $2 va output uchun $6 dan boshlanadi.
Qisqasi, Grok 4.6’dagi asosiy yo‘nalish — chatbotdan ko‘ra, vazifani o‘zi rejalashtirib, bajarib, tekshirib va takomillashtira oladigan AI-agentlarga yaqinlashish.
