Microsoft kompaniyasi Windows 11 operatsion tizimidagi «Sozlamalar» (Settings) ilovasini sun’iy intellekt bilan integratsiya qilib, foydalanuvchilarga tizim sozlamalarini tez va oson topishga hamda o‘zgartirishga yordam berishni maqsad qilgan.
Yangi AI-assistent bevosita qidiruv maydoniga o‘rnatilgan bo‘lib, foydalanuvchi so‘rovini tabiiy tilda kiritishi mumkin. Bu yordamchi foydalanuvchining niyatini tushunadi, kerakli parametrlarni tavsiya qiladi yoki ba’zida avtomatik tarzda o‘zgarishlarni amalga oshiradi. Masalan, foydalanuvchi “kompyuterni ovoz bilan qanday boshqarish mumkin?” deb yozsa, u «Voice Access» funksiyasini yoqishni taklif qiladi. Ba’zi sozlamalarni, agar imkon bo‘lsa, «Bekor qilish» (Undo) tugmasi orqali qayta bekor qilish ham mumkin.
Mazkur yordamchi Copilot kabi chat-bot emas — u fonda ishlaydigan, faqat foydalanuvchi qidiruv maydoniga murojaat qilganda faollashadigan ichki vosita hisoblanadi. Ilgari Microsoft «Copilot ko‘rsatmalari» (Copilot hints) funksiyasini sinovdan o‘tkazgan edi, biroq keyinchalik undan voz kechib, shu turdagi ichki AI-agentga ustuvorlik berdi.
Assistent Mu nomli til modeli asosida ishlaydi — bu internetga ulanmasdan, to‘liq qurilma ichida faoliyat yuritadigan ixcham sun’iy intellekt modelidir. U maxsus neyroprotsessor yordamida so‘rovlarni bir soniyada 100 dan ortiq token tezlikda qayta ishlay oladi. Microsoft dastlab LoRA orqali qayta o‘qitilgan Phi modelidan foydalanishni rejalashtirgan, biroq u sust javob tezligi tufayli rad etilgan. Mu modeli esa ko‘proq va xilma-xil ma’lumotlarda, xususan, foydalanuvchilarning real so‘rovlari hamda sun’iy yaratilgan namunalar asosida qayta o‘qitilgan. Natijada, u yuzlab tizim sozlamalarini qamrab oladi va yuqori aniqlikda, tezkor javob bera oladi. U ayniqsa batafsil yozilgan matnli so‘rovlarni yaxshiroq tushunadi hamda eng ko‘p ishlatiladigan parametrlarga ustuvorlik beradi, bu esa chalkashliklarning oldini oladi.
Hozircha ushbu AI-assistent faqat Copilot+ qurilmalari va Windows Insider dasturi ishtirokchilari uchun mavjud. Boshqa mos keluvchi qurilmalarga qachon taqdim etilishi hozircha ma’lum emas.
