2025-yilgi Jahon bankining davlat texnologiyalari bo‘yicha Indeksi (GTMI) natijalari e’lon qilindi va O‘zbekiston uchun bu tarixiy ko‘rsatkich bo‘ldi: mamlakat dunyo bo‘yicha 9-o‘ringa ko‘tarilib, raqamli hukumat tizimini shakllantirishda eng ilg‘or davlatlar qatoriga kirishga muvaffaq bo‘ldi. Eng e’tiborlisi, so‘nggi besh yil ichida erishilgan sakrash miqyosi juda katta — 2020-yilda 80-o‘rinda qayd etilgan O‘zbekiston 2022-yilda 43-o‘ringa, 2025-yilda esa ilk o‘ntalikka kirishga muvaffaq bo‘ldi. Shu tariqa mamlakat 71 pog‘onaga yuqorilab, o‘z indikatorini 0,617 dan 0,958 ga oshirdi.
GTMI indeksi davlat boshqaruvidagi raqamli transformatsiya darajasini o‘lchaydi. Baholash jarayonida bazaviy davlat tizimlarining raqamlashtirilganligi, onlayn davlat xizmatlarining qulayligi va kengayishi, fuqarolarning raqamli hukumatga jalb etilishi hamda GovTech rivojlanishini qo‘llab-quvvatlovchi sharoitlar hisobga olinadi. Ushbu natijalar O‘zbekistonning davlat boshqaruv tizimini yangilash, axborot texnologiyalarini joriy etish hamda fuqarolarga ko‘rsatiladigan xizmatlarni zamonaviylashtirish borasidagi izchil islohotlari samaradorligini tasdiqlaydi.
2025-yil yakunlariga ko‘ra mamlakat Markaziy Osiyoda birinchi o‘rinni egalladi va global miqyosda raqamli hukumat bo‘yicha eng ilg‘or davlatlar safiga qo‘shildi. O‘zbekiston bu borada Janubiy Koreya, Avstraliya, Hindiston va Kanada kabi kuchli raqamli infratuzilma va innovatsion boshqaruv tizimiga ega mamlakatlar bilan bir qatorda qayd etildi. Bu esa mamlakatning xalqaro maydondagi mavqeini mustahkamlash bilan birga, raqamli rivojlanish bo‘yicha yangi hamkorlik va investitsiya imkoniyatlarini ochadi.
Davlat texnologiyalaridagi bunday yuksalish mamlakat boshqaruv tizimini zamonaviylashtirish jarayonlari nafaqat to‘g‘ri yo‘nalishda olib borilayotganini, balki qisqa vaqt ichida sezilarli natija berganini ko‘rsatadi. Elektron xizmatlarning qulaylashuvi, jarayonlarning shaffoflashuvi, fuqarolar uchun ma’lumot va xizmatlarga kirish imkoniyatlarining kengayishi bu jarayonning kundalik hayotdagi real ifodasidir.
O‘zbekistonning raqamli hukumatga o‘tish bo‘yicha bosib o‘tgan yo‘li endilikda nafaqat ichki, balki xalqaro miqyosda ham ilg‘or tajriba sifatida e’tirof etilmoqda. Ushbu yutuq mamlakatni innovatsion boshqaruvning yangi bosqichiga olib chiqib, iqtisodiy islohotlar samaradorligiga ham bevosita ta’sir ko‘rsatishi kutilmoqda. Raqamli transformatsiyaning bunday sur’ati O‘zbekistonni kelajakda global raqamli markazlardan biriga aylantirish potentsialiga ega.
