AloqaVentures o‘z investitsiya portfelini kengaytirishda davom etmoqda. Navbatdagi investitsiya O‘zbekistonda ishlab chiqilgan va umumiy ovqatlanish sohasi uchun mo‘ljallangan POS platforma — AliPos startapiga yo‘naltirildi. Fond mazkur loyihaga 80 000 AQSh dollari miqdorida sarmoya kiritdi.
AliPos — Startup Garagening Samarqanddagi filial rezidenti bo‘lib, 2023-yildan buyon faoliyat yuritmoqda. Loyihani to‘liq mahalliy mutaxassislar jamoasi yaratgan. Dastlab autsorsing xizmatlari sifatida boshlangan platforma, vaqt o‘tishi bilan o‘zining to‘laqonli raqamli mahsulotiga aylandi.
Bugungi kunga kelib AliPos tizimi 830 dan ortiq korxonada joriy etilgan. Platforma quyidagi xizmatlarni birlashtiradi:
– POS tizimi
– moliyaviy nazorat
– ombor boshqaruvi
– statistik tahlil
– 24/7 texnik yordam
AloqaVentures sarmoyasi evaziga startapning 6.67% ulushiga egalik qiladi. Startap baholanishi esa 1.2 million AQSh dollari deb belgilangan.
AliPos jamoasi yaqin istiqbolda mahsulotini Markaziy Osiyo va MDH davlatlari bozorlariga olib chiqishni, uzoq muddatda esa Yevropa va AQShga ekspansiya qilishni rejalashtirmoqda.
Fikr bildirish