Apple sun’iy intellekt uchun mo’ljallangan yangi avlod Mac kompyuterlari ustida ishlamoqda. Insayderlar bergan ma’lumotlarga ko’ra, kompaniya ishlab chiqayotgan M7 Ultra chipi 1,5 TB gacha unified memory (yagona operativ xotira)’ni qo’llab-quvvatlashi mumkin. Agar bu tasdiqlansa, yangi Mac Apple tarixidagi eng kuchli va eng qimmat kompyuterlardan biriga aylanishi kutilmoqda.
Ma’lumotlarga ko’ra, Apple protsessorlar strategiyasini ham qayta ko’rib chiqmoqda. Kompaniya resurslarni AI uchun optimallashtirilgan M7 oilasiga yo’naltirish maqsadida M6 Pro, M6 Max va M6 Ultra chiplarini chiqarishni bekor qilishi mumkin.
Yangi chipning asosiy maqsadi — katta hajmdagi sun’iy intellekt modellarini qurilmaning o’zida ishga tushirish. 1,5 TB unified memory katta til modellari (LLM), video generatsiyasi, 3D grafika va ilmiy hisob-kitoblar bilan ishlaydigan mutaxassislar uchun yangi imkoniyatlar yaratadi.
Insayderlarning ta’kidlashicha, unumdorlik jihatidan M7 Ultra Apple Silicon tarixidagi eng kuchli chip bo’ladi va AI hisoblash quvvatida Nvidia Blackwell kabi professional platformalarga yaqinlashishi mumkin. Biroq Apple’ning asosiy maqsadi server bozori emas, balki professional Mac foydalanuvchilari uchun AI imkoniyatlarini sezilarli darajada kengaytirish hisoblanadi.
Apple hozircha M7 Ultra haqida rasmiy ma’lumot bermagan. Shunga qaramay, kompaniyaning so’nggi strategiyasi Apple Intelligence va lokal AI hisoblash imkoniyatlarini rivojlantirishga qaratilganini inobatga olsak, bunday qurilma paydo bo’lishi ehtimoldan xoli emas.
