O‘zbekistondagi B2B marketplace Bigmart $500 minglik Pre-seed investitsiya raundini yopdi. Sindikatlashgan raundda Imkon Ventures, Aloqa Ventures va United Ventures venchur fondlari ishtirok etdi.
Bigmart 2024-yilda tashkil etilgan bo‘lib, kompaniyalar uchun korporativ xaridlarni bir platformada boshqarish imkonini beradi. Platforma orqali bizneslar turli mahsulot va xizmatlarni bir joydan xarid qilishi, yetkazib beruvchilar bilan ishlash va xarid jarayonlarini markazlashtirishi mumkin.
Hozirda Bigmart platformasida 40 mingdan ortiq mahsulot mavjud. Ular orasida kanselyariya buyumlari, maishiy kimyo, elektronika, oziq-ovqat va korporativ sovg‘alar bor. Kompaniyaning mijozlari qatorida Murad Buildings, Akfa, Wildberries, Ground Zero va Kapital Bank kabi bizneslar mavjud.
Bigmart yangi jalb qilingan $500 ming mablag‘ni biznesni kengaytirish va platformani rivojlantirishga yo‘naltirmoqchi. Kompaniya B2B savdolarni kengaytirish, yangi segmentlarga kirish va banklar orqali distribyutsiya kanalini rivojlantirishni rejalashtirgan.
Shuningdek, Bigmart xarid jarayonlarini avtomatlashtirish uchun AI texnologiyalaridan foydalanishni boshlaydi. Jumladan, kompaniya xaridlarni prognoz qilish va mijozlarga mos mahsulotlarni tavsiya qilish uchun sun’iy intellekt asosidagi yechimlarni ishlab chiqishni rejalashtirmoqda.
Yangi raund Bigmart uchun korporativ xaridlar bozoridagi faoliyatini kengaytirish va texnologik infratuzilmasini rivojlantirishning navbatdagi bosqichi bo‘ladi.
