22-sentabr kuni ICT Week Uzbekistan 2026 doirasidagi Startup & Venture Summit’da IT Park Ventures bir nechta texnologik startapga investitsiya ajratilganini e’lon qildi.
Bigmart, ORA, Layf, Q.Watt va UrbanDrive IT Park Ventures’dan investitsiya oldi. Tezbor esa Digital Startups 1+1 dasturi doirasida moliyalashtirildi.
Bigmart — $100 ming
B2B marketplace korporativ xaridlarni bitta platformada amalga oshirish imkonini beradi. Unda 40 mingdan ortiq mahsulot mavjud. Kompaniya yangi mablag‘ni mahsulotni rivojlantirish, savdo jamoasini kengaytirish va AI-assistentni joriy etishga yo‘naltiradi.
ORA — $150 ming
AI-platforma brendlarga blogerlar va UGC-kreatorlar orqali marketing kampaniyalarini boshqarishga yordam beradi. ORA tarmog‘ida 30 mingdan ortiq kontent yaratuvchi bor. IT Park Ventures investitsiyasidan tashqari, kompaniya mahalliy venchur fondidan yana $50 ming jalb qilgan.
Layf — $100 ming
Layf Markaziy Osiyo va Kavkazda internet-do‘konlar, yetkazib berish servislar va super-ilovalarni ishga tushirish uchun e-commerce, to‘lov, logistika, CRM va AI vositalarini birlashtiradi. Kompaniya O‘zbekiston, Qozog‘iston, Tojikiston va Armanistonda hamkorliklarni rivojlantirmoqda.
Q.Watt — investitsiya summasi oshkor qilinmagan
Pauerbank sharing va mikromobillik platformasining O‘zbekistondagi tarmog‘i 4 900 dan ortiq stansiyani o‘z ichiga oladi. Oylik faol foydalanuvchilar soni 97 mingga, velosipedlar parki esa 1 500 donaga yetgan. Q.Watt O‘zbekiston, Tojikiston va Bolgariyada faoliyat yuritmoqda.
UrbanDrive — $100 ming
Avtomobil sotib olish va sotish uchun raqamli platforma xaridorlar, rasmiy dilerlar va moliyaviy xizmatlarni birlashtiradi. Foydalanuvchilar avtomobil tanlash, narxlarni solishtirish va kredit uchun ariza topshirish jarayonlarini platforma orqali amalga oshirishi mumkin. UrbanDrive’ga Yoshlar Ventures ham $100 ming investitsiya kiritgan.
Tezbor — $100 ming
AI asosidagi logistika platformasi internet-do‘konlar, mustaqil kuryerlar va posilka qabul qilish punktlarini birlashtiradi. Kompaniya 500 dan ortiq mijoz bilan ishlaydi va O‘zbekiston, Qozog‘iston hamda Daniyada faoliyat yuritadi.
Tezbor investitsiyani Digital Startups 1+1 dasturi doirasida oldi.
IT Park Ventures’ning yangi investitsiyalari korporativ xaridlar, AI-marketing, e-commerce, mikromobillik, avtomobil bozori va logistika kabi yo‘nalishlarni qamrab oldi.
