14-yanvar kuni IT Park’da bosh direktor Farhod Ibragimov rahbarligida IT Park vakillari va “Bolt” kompaniyasining jamoatchilik va davlat organlari bilan aloqalar bo‘limi rahbari Yuliya Malich o‘rtasida uchrashuv bo‘lib o‘tdi. Muzokaralarda O‘zbekistonda startaplar ekspertizasini oshirish, texnologiyalarni rivojlantirish va hamkorlik istiqbollari muhokama qilindi. “Bolt” kompaniyasi mobillik va yetkazib berish xizmatlarining yetakchi xalqaro ishtirokchilaridan biri hisoblanadi.
Nega bu muhim?
“Bolt” — Yevropaning eng yirik super ilovalaridan biri bo‘lib, 50 dan ortiq mamlakatda (600 dan ziyod shahar) 200 milliondan ortiq mijozga xizmat ko‘rsatadi. Kompaniya shaharlarni insonlar uchun qulay qilishga intilib, shaxsiy avtomobillardan umumiy mobillikka o‘tishni tezlashtirishga qaratilgan yechimlarni taklif etadi. Uning xizmatlari qatoriga taksi, karshering, elektr samokatlar ijarasi, shuningdek, ovqat va mahsulot yetkazib berish kiradi.
Markaziy Osiyo, xususan, O‘zbekiston bozoriga kirish “Bolt” uchun ustuvor ahamiyat kasb etadi. Kompaniya davlat organlari va Raqamli rivojlanish vazirligi bilan hamkorlikni yo‘lga qo‘yishni maqsad qilmoqda. Uchrashuv davomida IT Park vakillari O‘zbekiston IT-iste’dodlarini kompaniya dasturiy ta’minotini ishlab chiqish va qo‘llab-quvvatlashga jalb qilish, shuningdek, bek-ofis ochish imkoniyatini taklif qildi. Farhod Ibragimov IT Park tomonidan kompaniyaning muvaffaqiyatli faoliyati uchun zarur resurslarni, jumladan, malakali xodimlarni tanlashda yordam ko‘rsatilishini ta’kidladi.
Yuliya Malich O‘zbekistonning tez rivojlanayotgan bozoriga katta qiziqish bildirdi. Aholining tez o‘sishi, yosh mutaxassislarning ko‘pligi va raqamli texnologiyalarning rivojlanishi mamlakatni yangi investitsiyalar uchun jozibador qiladi. Shuningdek, “Bolt” mutaxassislari mahorat darslari orqali tajriba almashish imkoniyatlarini muhokama qilishdi.
“Bolt”ning O‘zbekistonga kirib kelishi mahalliy startaplar va texnologik kompaniyalarning xalqaro maydondagi raqobatbardoshligini oshirish uchun yangi imkoniyatlar yaratadi. Ushbu hamkorlik startap ekotizimini takomillashtirish va texnologik bilim darajasini yuksaltirishga xizmat qiladi.
