Sun’iy intellekt odatda savollarga javob beruvchi chatbot sifatida tasavvur qilinadi. Ammo AQShning Ello kompaniyasi AI’ni butunlay boshqa vazifa uchun qo‘llamoqda — bolalarga o‘qishni o‘rgatish. Kompaniya ta’kidlashicha, ularning tizimi bolaning har bir so‘zi va xatosini real vaqt rejimida tahlil qilib, atigi 1000 millisekund (1 soniya) ichida qanday javob berishni hal qiladi. Bu esa AI’ni oddiy chatbot emas, balki shaxsiy o‘qituvchi darajasiga yaqinlashtiradi.
Ello’ning asosiy g‘oyasi oddiy: har bir bola turlicha o‘rganadi. Kimdir yangi so‘zni darhol o‘qiydi, boshqasi esa bir necha marta urinadi. Shu sababli barcha bolalarga bir xil javob beradigan tizim samarali emas. Ello bolaning ovozini tinglaydi, qayerda qiynalayotganini aniqlaydi va shu vaziyatning o‘zida qanday yordam berish kerakligini hal qiladi. Ba’zida u so‘zni bo‘g‘inlarga ajratadi, ba’zida talaffuzni ko‘rsatadi, ayrim hollarda esa bolani mustaqil javob topishga undaydi. Bularning barchasi bir soniyadan kam vaqt ichida amalga oshiriladi.
Kompaniya fikriga ko‘ra, bunday tizimni oddiy LLM modeliga prompt yozish orqali yaratishning iloji yo‘q. Shu sabab Ello butun boshli AI infratuzilmasini noldan ishlab chiqqan. Tizim bir nechta komponentlardan iborat:
- bolalar nutqini aniqlovchi maxsus speech recognition modeli;
- bolaning bilim darajasini baholovchi AI;
- pedagogik qaror qabul qiluvchi agent;
- tabiiy ovoz bilan javob qaytaruvchi nutq generatori.
Ularning barchasi parallel ishlaydi va umumiy kechikish 1 soniyadan kam bo‘lishi kerak. Ta’lim bo‘yicha ko‘plab tadqiqotlar shuni ko‘rsatadiki, individual dars berish sinfdagi an’anaviy o‘qitishga qaraganda ancha samarali. Ammo har bir bolaga alohida o‘qituvchi ajratish deyarli imkonsiz. Ello aynan shu muammoni AI yordamida hal qilishni maqsad qilgan. Tizim har bir bolaning o‘qish sur’ati, qiziqishi va xatolariga moslashib boradi. Natijada barcha foydalanuvchilar bir xil tajribaga ega bo‘lmaydi — har bir bola uchun dars jarayoni individual shakllanadi.
