Google HTC kompaniyasining kengaytirilgan reallik (XR) biznesining bir qismini 250 million dollarga sotib olishga kelishib oldi. Bu kelishuv kompaniyaning yaqinda ishga tushirilgan Android XR platformasi orqali virtual va kengaytirilgan reallik texnologiyalarini rivojlantirish yo’lidagi navbatdagi qadami bo’ldi.
Tayvanning HTC kompaniyasi bergan ma’lumotga ko’ra, bitim doirasida HTC VIVE muhandislik jamoasining bir qismi Google’ga o’tadi va kompaniya Google’ga eksklyuziv bo’lmagan intellektual mulk huquqlarini taqdim etadi. Shu bilan birga, HTC texnologiyani ishlab chiqish va undan foydalanish huquqini saqlab qoladi.
Bu kelishuv Google va HTC o’rtasidagi ikkinchi yirik bitim hisoblanadi. 2017-yilda Google HTC’ning smartfon bo’linmasini 1,1 milliard dollarga sotib olgan edi.
Google ushbu xarid Android XR platformasini bosh va ko’zoynak qurilmalarida yanada rivojlantirishga xizmat qilishini ta’kidladi. Hozirda texnologiya gigantlari XR texnologiyasida yetakchilik uchun kurash olib borayotgan bir paytda, Apple va Meta ushbu bozorning asosiy yetakchilari sifatida qolmoqda.
Google va HTC kelajakda qo’shimcha hamkorlik imkoniyatlarini ham o’rganib chiqishlarini bildirishdi.
