Ushbu sharhda dunyoning yirik kompaniyalaridagi eng qiziqarli va talabgir IT-amaliyot dasturlari haqida ma’lumot beriladi.
Ma’lumotlar tahlili va ishlab chiqish bo‘yicha amaliyot – General Motors
Joylashuv: Dubay
General Motors kompaniyasi jasur muhandislik va biznes tashabbuslarini amalga oshiradigan yangi avlod vakillarini izlamoqda. Ma’lumotlarni tahlil qilish va qayta ishlash bo‘yicha amaliyotchilar qarorlarni ma’lumotlar asosida qabul qilish bo‘yicha amaliy tajribaga ega bo‘lishadi, jamoa bilan ishlashadi va biznes jarayonlarini takomillashtirish maqsadida global savdoni tahlil qilish hamda vizualizatsiya qilishda o‘z hissalarini qo‘shadilar.
ABC telekanalida amaliyot
Joylashuv: Kaliforniya, AQSh
Dastur ishtirokchilari tarmoq texnologiyalari, efir avtomatizatsiyasi, IP-translyatsiya tizimlari va texnik qo‘llab-quvvatlash bilan tanishadilar. Ular masofaviy translyatsiyalar va yirik tadbirlar uchun uskunalarni sozlashda ishtirok etadilar. IT, kompyuter fanlari yoki televideniye sohalarida ta’lim olayotgan talabalar qabul qilinadi. Microsoft tizimlari va tarmoq bilan ishlash bo‘yicha bazaviy ko‘nikmalar talab qilinadi. Amaliyot pullik bo‘lib, 2025-yil iyunidan 2026-yil yanvarigacha kompaniya ofisida o‘tkaziladi.
Data Scientist amaliyotchisi – HP
Joylashuv: Hyuston, AQSh
HP kompaniyasi Data Science, Computer Science yoki Sun’iy intellekt yo‘nalishida magistratura talabalariga katta hajmdagi ma’lumotlarni tahlil qilish, mashinali o‘rganish va biznes jarayonlarini optimallashtirish bo‘yicha amaliy tajriba taklif qiladi. 12 haftalik pullik amaliyot davomida ishtirokchilar ma’lumotlarni qayta ishlash strategiyalarini ishlab chiqish, prognozlash modellari yaratish, ish jarayonlarini avtomatlashtirish va analitikani vizualizatsiya qilishda qatnashadilar. Python yoki R dasturlash tillari, shuningdek bulut platformalari va ma’lumotlar bilan ishlash vositalari bo‘yicha bilim talab qilinadi.
Software Engineer amaliyoti – Boeing Poland
Joylashuv: Polsha
Boeing Poland zamonaviy uchish qurilmalari uchun aviatsiya va elektron tizimlarni ishlab chiqishda ishtirok etish imkoniyatini taklif etadi. Amaliyot davomida ishtirokchilar dasturiy ta’minot arxitekturasi yaratish, integratsiya va test qilishda, shuningdek Model-Based Design kabi zamonaviy ishlab chiqish metodologiyalarini o‘rganishda qatnashadilar. C++ yoki boshqa yuqori darajadagi dasturlash tilini bilish, MATLAB va Simulink bilan ishlash ko‘nikmalari talab qilinadi.
Arizalarni topshirish muddati: 12-may
Texnologiya yo‘nalishidagi amaliyot – Johnson & Johnson
Joylashuv: Shanxay, Xitoy
Johnson & Johnson murakkab biznes muammolarini hal etish uchun analitik modellar va algoritmlar bilan ishlash imkonini taqdim etadi. Amaliyotchilar katta hajmdagi ma’lumotlarni tahlil qilish, tendensiyalarni aniqlash, natijalarni vizualizatsiya qilish va analitik jarayonlarni takomillashtirishda qatnashadilar. Python, R yoki SQL bo‘yicha bilim, shuningdek vizualizatsiya vositalari bilan ishlash ko‘nikmalari talab qilinadi. Dastur professional jamoalar bilan ishlash, texnik ko‘nikmalarni rivojlantirish va ishga joylashish imkoniyatlarini taqdim etadi.
Dasturchi amaliyotchisi – IBM Consulting
Joylashuv: AQSh
IBM talabalarni dasturiy ta’minot ishlab chiqish, real biznes muammolariga yechim topish va sinovdan o‘tkazishda ishtirok etishga taklif etadi. Amaliyotchilar bulut texnologiyalari, sun’iy intellekt, API, DevOps va zamonaviy ishlab chiqish metodlari (Agile, Scrum) bilan ishlaydi. Python, JavaScript, Java dasturlash tillari va CI/CD, Docker, Kubernetes, SQL bo‘yicha ko‘nikmalar talab qilinadi. Amaliyot 2025-yil sentabr oyida boshlanadi va 8 yoki 12 oy davom etadi.
Yozgi Cloud Product Release amaliyoti – Oracle
Joylashuv: AQSh
Ushbu amaliyot dasturi bulut mahsulotlarining chiqarilish jarayonlarini boshqarishni o‘rganmoqchi bo‘lgan talabalar uchun mo‘ljallangan. Amaliyotchilar chiqarish jarayonlarini tahlil qilish, talablarni yig‘ish, muddatlarni muvofiqlashtirish, konfiguratsiya modellarini yaratish va ma’lumotlar auditini o‘tkazishda ishtirok etadilar. APEX, Microsoft Excel bilan ishlash ko‘nikmalari hamda murakkab muammolarni tahlil qilish va hal etish qobiliyati talab etiladi. Oracle moslashuvchan ish jadvali, professional jamoa va martaba o‘sishini taklif etadi.
