Meta sun’iy intellekt yo’nalishidagi yangi ishlanmasi — Muse Image modelini rasman taqdim etdi. Bu Meta Superintelligence Labs (MSL) tomonidan yaratilgan ilk tasvir generatsiyasi modeli bo’lib, kompaniyaning Meta AI ekotizimidagi barcha vizual AI funksiyalarini bosqichma-bosqich quvvatlantiradi. Muse Image oddiy matnli so’rovlar asosida yuqori sifatli tasvirlar yaratish bilan cheklanmaydi. Model murakkab ko’rsatmalarni aniq tushunadi, mavjud rasmlarni tahrirlay oladi, bir nechta referens tasvirlarni bitta kompozitsiyaga birlashtiradi hamda chizma yoki eskizlar orqali tasvirlarni qayta ishlash imkonini beradi.
Meta’ning ta’kidlashicha, Muse Image agentik (agentic) yondashuv asosida ishlaydi. Ya’ni model tasvir yaratishdan oldin kerak bo’lsa qidiruv va kod yozish vositalaridan foydalanib natijani yaxshilaydi. Masalan, grafiklar, diagrammalar yoki QR-kodlarni yaratishda model kod yozib, uni ishga tushirishi va natijadan foydalanib yakuniy tasvirni hosil qilishi mumkin.
Yangi model Meta’ning Muse Spark AI modeli bilan ham integratsiya qilingan. Ikkala model birgalikda ishlash orqali GIF animatsiyalar, interaktiv vizualar va tasvirlar bilan boyitilgan veb-sahifalarni yaratishga qodir. Shu bilan birga Meta Muse Video nomli video generatsiya modelining ham ilk namoyishini o’tkazdi.
Hozircha Muse Image Meta AI ilovasi va meta.ai platformasi orqali foydalanishga taqdim etilgan. AQShda u Instagram Stories’ga integratsiya qilinmoqda, WhatsApp’da esa ayrim mamlakatlarda ishga tushirilgan. Kelgusida model Facebook va boshqa Meta xizmatlarida ham paydo bo’lishi rejalashtirilgan.
