Ilon Mask asos solgan xAI kompaniyasi sun’iy intellekt yo’nalishidagi navbatdagi yirik yangiligini e’lon qildi. Kompaniya Grok 4.5 modelini rasman taqdim etdi va uni hozirgacha yaratilgan eng kuchli Grok modeli deb atamoqda. Model dasturlash, AI agentlari va murakkab bilim talab qiladigan vazifalar uchun maxsus optimallashtirilgan.
Grok 4.5 avvalgi versiyalarga qaraganda kod yozish, kodni tahlil qilish va murakkab muammolarni yechishda sezilarli darajada yaxshilangan. xAI’ning ta’kidlashicha, model uzoq kontekst bilan ishlash, texnik hujjatlarni tushunish hamda agentik (agentic) vazifalarni bajarishda yuqori natija ko’rsatadi.
Yangi modelning yana bir muhim jihati — u Cursor bilan hamkorlikda o’qitilgan. Cursor platformasidan olingan anonim dasturchilar ish jarayonlari modeli dasturlash bo’yicha yanada samaraliroq qilishga yordam bergan. Natijada Grok 4.5 kod generatsiyasi va dasturiy ta’minot ishlab chiqish jarayonlarida korporativ foydalanuvchilarga mo’ljallangan yechim sifatida taqdim etilmoqda.
xAI Grok 4.5’ni API orqali ham taqdim etdi. Kompaniya model narxini 1 million input token uchun 2 dollar, 1 million output token uchun 6 dollar etib belgiladi. Bu uni ayrim raqobatchi frontier AI modellari bilan solishtirganda ancha raqobatbardosh narx segmentiga olib chiqadi.
Grok 4.5 nafaqat chatbot sifatida, balki AI agentlari, dasturchilar va korxonalar uchun infratuzilmaviy model sifatida ham pozitsiyalanmoqda. xAI ushbu reliz orqali OpenAI, Anthropic va Google bilan korporativ AI bozoridagi raqobatni yanada kuchaytirishni maqsad qilgan.
