IT sohasida o‘z o‘rningizni topmoqchimisiz? ICT4Girls O‘zbekiston o‘quvchi qizlar olimpiadasi uchun ro‘yxatdan o‘tish boshlandi! Bu sizga dasturlash bo‘yicha qobiliyatlaringizni sinovdan o‘tkazish va Germaniyada o‘tkaziladigan xalqaro olimpiadaga yo‘l olish imkoniyatiga erishishga yordam beradi.
Ro‘yxatdan o‘tish va dastlabki saralash:
Ro‘yxatdan o‘tish jarayonida tanlagan dasturlash tili bo‘yicha 10 ta test topshirig‘i beriladi.
5 ta savolga to‘g‘ri javob bergan ishtirokchilar hududiy bosqichga yo‘llanma oladi.
Kimlar ishtirok eta oladi?
20 yoshgacha bo‘lgan maktab, kasb-hunar maktabi, akademik litsey va kollej o‘quvchi qizlari.
Ro‘yxatdan o‘tish formasidagi birlamchi saralashdan o‘tganlar.
“ICT4Girls” olimpiadasining vazifalari quyidagilardan iborat:
● Ta’lim muassasalarida informatika fani, shu jumladan, dasturlashni
zamonaviy talablar darajasida o‘qitishga erishish;
● O‘quvchi qizlarning informatika fani, xususan, dasturlashni chuqur
o‘rganishga qiziqishini oshirish;
● Dasturlash bo‘yicha qobiliyatli va iqtidorli o‘quvchi qizlarni aniqlash va
ularning dasturlash, algoritmik tafakkur va muammolarni yechish
bo‘yicha bilim va ko‘nikmalarini rivojlantirish;
● Iqtidorli o‘quvchi qizlarning xorijiy mamlakatlardagi tengdoshlari bilan
do‘stona raqobat qila olishlari uchun tegishli sharoit va muhit yaratish,
ularda xalqaro olimpiadalarda muvaffaqiyatli qatnashish ko‘nikmasini
mustahkamlash;
● Iqtidorli yoshlarning mahalliy va xalqaro olimpiadalarda erishgan
natijalarini tengdoshlari orasida targ‘ib etishni yanada kuchaytirish.
Olimpiada 2 bosqichda o‘tkaziladi:
Hududiy bosqich: Eng yaxshi natija ko‘rsatgan kamida 3 nafar qiz Respublika bosqichiga chiqadi.
Respublika bosqichi: 12 nafar g‘olib aniqlanadi va ular munosib taqdirlanadi!
Hududiy bosqich barcha hududlarda bir vaqtda o‘tkaziladi.
Respublika bosqichi Toshkent shahrida o‘tkaziladi.
Olimpiada savollari ingliz va o‘zbek tillarida taqdim etiladi.
G‘oliblar uchun sport dasturlash bo‘yicha maxsus butkemp tashkil etiladi. Unda saralangan 4 nafar qiz Germaniyaning Bonn shahrida bo‘lib o‘tadigan Yevropa qizlar olimpiadasida (EGOI 2025) O‘zbekiston terma jamoasi tarkibida ishtirok etadi.
Topshiriqlar C++ yoki Python dasturlash tillarida yechiladi. Har bir bosqich uchun berilgan topshiriqlarni bajarish uchun umumiy 5 (besh) soat vaqt beriladi.
Olimpiada nizomi: Ro’yhatdan o’tish
Ro‘yxatdan o‘tish muddati: 23-mart, soat 23:59 gacha!
Hozir ro‘yxatdan o‘ting va IT sohasida xalqaro muvaffaqiyat sari ilk qadamni qo‘ying!
