Josef Rutakangva bir necha yil davomida kompaniyalarga iste’molchilar xatti-harakatlarini chuqurroq tushunishga yordam beradigan vositalarni izlab yurgan. Natijada, u bu muammoni o‘zi hal qilishga qaror qildi va 2021-yilda Erik Sevankambo bilan birgalikda Rwazi startapiga asos solgan.
Yaqinda Rwazi kompaniyasi Bonfire Ventures boshchiligida o‘tkazilgan 12 million dollarlik A bosqich investitsiya raundini yakunladi. Bu sarmoya kompaniyaning sun’iy intellektga asoslangan bozor razvedkasi va iste’molchi xulq-atvorini tahlil qilish tizimini kengaytirishga xizmat qiladi.
Rutakangva aytishicha, AQSh, Buyuk Britaniya va Yevropaning ba’zi hududlarida iste’molchilar haqidagi ma’lumotlar mavjud bo‘lsa-da, Hindiston, Braziliya, Meksika, Yaponiya, Turkiya va Xitoy kabi yirik bozorlarda bu ma’lumotlar deyarli mavjud emas. Davlat statistikasi yoki odatiy so‘rovlar bu muammoni hal qila olmagan, chunki ular eskirgan, noto‘liq yoki ishonchsiz bo‘lgan.
Shuning uchun Rwazi innovatsion yondashuvni – iste’molchilar tomonidan ixtiyoriy ravishda real vaqt rejimida taqdim etiladigan “zero-party” ma’lumotlarni – joriy etdi. Bu texnologiya har qanday geografik hududda iste’molchilarning amaliy odatlarini aniqlash imkonini beradi.
Rwazi ishlab chiqqan sun’iy intellekt asosidagi platforma kompaniyalarga real vaqtli qarorlar qabul qilishda yordam beradi, marketing xarajatlarini kamaytiradi va mijozlar sadoqatini oshiradi. Kompaniyaning mijozlari orasida Coca-Cola, Pampers, Visa va Nestlé kabi global brendlar mavjud.
Rwazi ilgari 2022-yilda ham Bonfire Ventures boshchiligida 4 million dollarlik boshlang‘ich investitsiya olgan edi. Bu safargi moliyalashtirish raundida Santa Barbara Ventures, Newfund va Alumni Ventures ham ishtirok etdi.
Hozirda kompaniya 190 mamlakatdan ma’lumot to‘plamoqda, asosiy mijozlari esa AQSh va Yevropada joylashgan. Yangi sarmoya yordamida Rwazi o‘zining sun’iy intellekt yordamchisining imkoniyatlarini kengaytirishni va yangi muhandislarni yollashni rejalashtirmoqda.
Bozorda GFK va Ipsos kabi raqobatchilar mavjud bo‘lsa-da, Rutakangwa Rwazi’ning ustunligini uning haqiqiy va to‘g‘ridan-to‘g‘ri ma’lumotlarga tayanishida ko‘radi.
“Bugun g‘olib bo‘lish – bu o‘zgarishlarni oldindan ko‘ra bilish va raqobatchilar hali sezmasdan oldin harakat qilishdir,” – deydi Rutakangva.
