Hujjat mamlakatda xalqaro investorlar uchun alohida huquqiy va soliq muhitini yaratishni hamda Toshkentni Markaziy Osiyoning yirik moliyaviy markazlaridan biriga aylantirishni maqsad qiladi. Qonunga ko‘ra, TMFC hududida O‘zbekiston qonunchiligi bilan bir qatorda, Konstitutsiyaga zid bo‘lmagan holatlarda ingliz huquqi tamoyillari ham qo‘llaniladi. Shuningdek, markaz tarkibida mustaqil moliyaviy xizmatlar regulyatori va xalqaro tijorat sudi tashkil etiladi.
Yangi tartib ishtirokchilarga bir qator muhim imkoniyatlarni beradi. Jumladan, kompaniyalar xorijiy mutaxassislarni ishga ruxsatnomasiz jalb qilishi mumkin bo‘ladi. Shartnomalar bo‘yicha hisob-kitoblarni xorijiy valyuta hamda kriptoaktivlarda amalga oshirishga ruxsat beriladi. Markaz ishtirokchilari va ularning oila a’zolari uchun esa 5 yilgacha amal qiluvchi maxsus vizalar joriy etiladi.
Qonunda uzoq muddatli soliq imtiyozlari ham nazarda tutilgan. 2076-yil 1-yanvargacha TMFC ishtirokchilari foyda solig‘i, ijtimoiy soliq hamda ayrim operatsiyalar bo‘yicha QQSdan ozod etiladi. Bundan tashqari, yer va mol-mulk soliqlari bo‘yicha ham yengilliklar beriladi. Markazda faoliyat yuritadigan xorijiy xodimlar uchun jismoniy shaxslardan olinadigan daromad solig‘i 0 foiz etib belgilanadi, O‘zbekiston fuqarolari va rezidentlari uchun esa ushbu stavka 7 foizni tashkil etadi.
TMFC tashkil etilishidan ko‘zlangan asosiy maqsad Toshkentni mintaqaviy moliyaviy markaz sifatida rivojlantirish, xalqaro investitsiyalarni jalb qilish, kapital bozori, fintech, islomiy moliya va raqamli aktivlar ekotizimini jadallashtirishdan iborat.
Agar qonun amaliyotda samarali ishlasa, TMFC nafaqat O‘zbekiston, balki butun Markaziy Osiyo uchun xalqaro moliyaviy xizmatlar va investitsiyalarni jalb qiluvchi yangi platformaga aylanishi mumkin.
