12-iyun kuni Toshkentda Stanford University Human-Centered Artificial Intelligence (HAI), OpenAI Academy va Silkroad Innovation Hub tomonidan tashkil etilgan AI Leaders 2026 dasturining bitiruv marosimi bo‘lib o‘tdi. Dastur Markaziy Yevroosiyoda rahbarlar va mutaxassislar uchun sun’iy intellekt bo‘yicha eng yirik ta’lim tashabbuslaridan biri hisoblanadi.
Loyiha O‘zbekiston Respublikasi Raqamli texnologiyalar vazirligi, IT Park Uzbekistan, Osiyo taraqqiyot banki (ADB) va Yoshlar ishlari agentligi ko‘magida amalga oshirildi.
AI Leaders 2026 dasturi to‘qqiz mamlakat — Ozarbayjon, Qozog‘iston, Qirg‘iziston, O‘zbekiston, Tojikiston, Turkiya, Qatar, BAA va Mo‘g‘ulistondan 800 dan ortiq rahbar va mutaxassisni birlashtirdi. Dasturda 150 dan ziyod tashkilot vakillari ishtirok etdi.
O‘zbekistondan esa 25 dan ortiq yetakchi tashkilotning 120 dan ziyod rahbarlari va qaror qabul qiluvchi mutaxassislari qatnashdi. Ular orasida davlat tashkilotlari, moliyaviy institutlar, texnologik kompaniyalar, ta’lim muassasalari hamda yirik korxonalar vakillari bor.
Bitiruv marosimida Raqamli texnologiyalar vazirining birinchi o‘rinbosari Ayubxon Sultonov, Silkroad Innovation Hub asoschisi va bosh direktori Aset Abdualiyev hamda Osiyo taraqqiyot bankining O‘zbekistondagi vakili Mirzo G‘ulomov so‘zga chiqib, sun’iy intellektni iqtisodiyot va boshqaruv tizimlariga joriy etish uchun yangi avlod liderlarini tayyorlash muhimligini ta’kidladilar.
Dastur O‘zbekiston Prezidentining sun’iy intellekt texnologiyalarini rivojlantirishga qaratilgan strategik vazifalarini qo‘llab-quvvatlashga xizmat qiladi. Xususan, malakali kadrlar tayyorlash, rahbarlarning AI bo‘yicha kompetensiyalarini oshirish va xalqaro ilmiy markazlar bilan hamkorlikni kengaytirish asosiy yo‘nalishlardan biri bo‘ldi.
AI Leaders 2026 dasturining akademik rahbari sun’iy intellekt sohasidagi taniqli mutaxassis, Stanford HAI professori va Google Research sobiq direktori Piter Norvig bo‘ldi. Dasturga, shuningdek, Aleks Pentland, Maykl Bernshteyn, Diya Yang va Maykel Koxenderfer kabi xalqaro ekspertlar ham jalb qilindi.
Sakkiz hafta davom etgan ta’lim jarayonida ishtirokchilar 45 soatdan ortiq o‘quv mashg‘ulotlarida qatnashdilar. Dastur Stanford HAI ma’ruzalari, OpenAI Academy amaliy mashg‘ulotlari, sohaviy workshoplar va strategik konsultatsiyalarni o‘z ichiga oldi.
Shuningdek, tashkilotlarda AI yechimlarini joriy etish bo‘yicha 240 dan ortiq strategik sessiyalar va 120 soatdan ziyod individual mentorlik uchrashuvlari o‘tkazildi. Amaliy mashg‘ulotlarda bank sektori, davlat boshqaruvi va ta’lim tizimi uchun AI agentlarini yaratish va tatbiq etishga alohida e’tibor qaratildi.
Dastur yakunida bitiruvchilar Stanford HAI va OpenAI Academy sertifikatlariga ega bo‘lishdi hamda Markaziy Yevroosiyodagi eng yirik professional AI hamjamiyatlaridan biri bo‘lgan AI Leaders Community tarkibiga qo‘shildilar.
Mutaxassislarning fikricha, AI Leaders 2026 kabi tashabbuslar Markaziy Osiyoda sun’iy intellekt bo‘yicha bilim va tajribani ommalashtirish, shuningdek, davlat va xususiy sektorning AI transformatsiyasini tezlashtirishda muhim rol o‘ynaydi.
