Yandex Uzbekistan sun’iy intellekt bilan boyitilgan yangilangan qidiruv tizimini ishga tushirdi. Endilikda tizim o‘zbek tilidagi so‘rovlarni yanada chuqurroq tushunadi hamda butun dunyodagi kontentga kirishni sezilarli darajada osonlashtiradi. Foydalanuvchilar inglizcha yoki ruscha materiallarni o‘zbek tilida ko‘rishlari, shuningdek, savollarni yozma shaklda berib, qisqa va mazmunli javoblarni olishlari mumkin.
O‘zbek tilini tushunadigan sun’iy intellekt
Yangi tizim o‘zbek tilida mashq qilingan neyrotarmoqlarni o‘z ichiga olgan. Bu esa Yandex Search xizmatiga foydalanuvchi niyatini aniqroq anglash, tegishli natijalarni taqdim etish va tarjimalarni yanada mazmunli qilish imkonini bermoqda.
Kontekstga asoslangan tarjimalar
Yandex Search endi ingliz va rus tillaridagi kontentni o‘zbek tiliga aniqlik bilan tarjima qila oladi. Eng muhimi, bu tarjimalar milliy va madaniy kontekstni inobatga olgan holda amalga oshiriladi. Ushbu yangilanish tufayli Wikipedia va Stack Overflow kabi global manbalardan o‘zbek tilida 11,6 milliondan ortiq materialdan bemalol foydalanish mumkin.
Suhbat shaklidagi qidiruv tajribasi
Foydalanuvchilar yandex.uz sahifasiga kirib, savollarni bevosita chat orqali kiritishlari mumkin. Sun’iy intellekt so‘rovni chuqur tahlil qilib, bir nechta ishonchli manbaga asoslangan holda ixcham va tushunarli javob shakllantiradi. Savollar o‘zbek yoki rus tilida berilishi mumkin — javoblar ham shu tilda taqdim etiladi.
Har doim dolzarb va yangilanib boradigan javoblar
Yandex Search sun’iy intellekti internetdagi eng so‘nggi ma’lumotlarni kuzatib boradi — hatto ular atigi bir necha soat oldin chop etilgan bo‘lsa ham. Har bir javob bilan birga, manba havolasi ham taqdim etiladi, bu esa foydalanuvchiga ma’lumot manbasini chuqurroq o‘rganish imkonini beradi.
O‘zbek interneti uchun yangi bosqich
Yandex Uzbekistan tomonidan joriy etilgan ushbu innovatsion yechim o‘zbek tilida internetdan foydalanish qulayligini sezilarli darajada oshiradi. Bu — nafaqat texnologik yangilik, balki o‘zbek tilida raqamli bilim olish imkoniyatlarini kengaytiruvchi muhim qadamdir.
