Venchur kapitali bozorida kapital allokatsiyasi har doim rasmiy bayonotlardan ko‘ra ko‘proq haqiqatni so‘zlaydi. Pivot va Stanbase hamkorligida tahlil qilingan ma’lumotlar O‘zbekiston texnologik bozorida tub burilish yuz berganini tasdiqlamoqda. Fond o‘tgan uch yil davomida (2022–2025) jami $4,1 million dollar investitsiya kiritgan bo‘lsa, 2025-yilning o‘zida bu ko‘rsatkich $5,25 million dollarga yetdi. Ushbu keskin o‘sish shunchaki byudjetning kengayishi emas, balki fond mandatining «ekotizimni uyg‘otish»dan «agressiv o‘sishni moliyalashtirish»ga o‘zgarganini anglatadi.
AloqaVentures 2022–2025-yillarda o‘ta ehtiyotkor, «risk averse» (xatardan qochish) siyosatini yuritgan, ya’ni bu davrda fond pulni faqat «oyoqda mustahkam turgan», bozorda o‘zini oqlagan va xatari minimal bo‘lgan, allaqachon yurib turgan startaplarga berishni afzal ko‘rgan. Kichik cheklar — bu ishonchsizlik belgisi emas, balki balki kapitalni asrashga qaratilgan ehtiyotkorlik chorasi edi.
2025-yilga kelib esa o‘yin qoidalari o‘zgardi. Investitsiya cheki diapazoni $10,000 dan $1,000,000 gacha kengaydi. Investitsiya spredining kattalashishi fondning risk darajasi (risk appetite) yuqorilaganini bildiradi. Nomi oshkor etilmagan startapga kiritilgan 1 million dollarlik rekord investitsiya, shuningdek, Smartup ($500k) va Startup Garage ($500k) kabi yirik bitimlar fondning endilikda nafaqat ehtiyotkor yurishlarni, balki katta tavakkalchilik talab qiladigan strategik o‘yinlarni ham boshlaganini ko‘rsatadi.
Fond faoliyatidagi yana bir muhim, ammo ko‘pchilikka noma’lum yangilik — bu daromadlilik ko‘rsatkichidir. AloqaVentures shu qisqa davr ichida portfeldagi 5 ta startapdan «Exit» qilishga (ulushini sotib chiqishga) ulgurgan. Biz bu bitimlarning aniq summasi va «X» multiplikatorlarini oshkor qila olmaymiz, ammo faktning o‘ziyoq bozorga jiddiy signal beradi: fond nafaqat pul kirityapti, balki exitlarni ham boshlagan.
Portfel strukturasidagi yana bir muhim o‘zgarish — bu iste’molchiga yo‘naltirilgan (B2C) ilovalardan murakkab B2B yechimlarga o‘tishdir. 2025-yilgi ro‘yxatda Smartup, Datatruck ($300k), Verifix ($250k) kabi loyihalarning ustunlik qilishi investorlarning kayfiyati pragmatiklashganini bildiradi. Ular endi foydalanuvchilar bazasining tez o‘sishiga emas, balki barqaror pul oqimi (cash-flow), unit-iqtisodiyot va eksport salohiyatiga e’tibor qaratmoqda.
AloqaVentures 2025-yilda o‘zining investitsion tezligini oshirish orqali bozorga aniq signal yubordi: mahalliy ekotizim «bolalik davri»dan chiqdi. Fond endi shunchaki mahalliy o‘yinchilarni qo‘llab-quvvatlovchi ehtiyotkor o’yinchi emas, balki global ambitsiyaga ega, tavakkal qilishga tayyor «Smart Money» institutiga aylandi.
Pivot va Stanbase hamkorligida har bir fond portfeli haqida yoritib boramiz
