O‘zbekiston Raqobatni rivojlantirish va iste’molchilar huquqlarini himoya qilish qo‘mitasi YandexGo UB’ga nisbatan “Raqobat to‘g‘risida”gi qonun buzilishi alomatlari bo‘yicha ish qo‘zg‘atdi. Bunga Uzum Market tomonidan berilgan murojaat asos bo‘ldi.
Unga ko‘ra, Yandex Market’ning reklama roligida Uzum Market faoliyatini salbiy kontekstdagi taqqoslash orqali insofsiz raqobatga yo‘l qo‘yilgan va kompaniya ishchanlik obro‘siga putur yetkazilgan. Qo‘mitaning Maxsus komissiyasi holatni qonunning 21-moddasi asosida ko‘rib chiqmoqda.
Qonunda taqiqlangan harakatlar qatoriga quyidagilar kiradi:
- raqobatchining tovari yoki narxi haqida buzib ko‘rsatilgan yoki yolg‘on ma’lumot tarqatish;
- noto‘g‘ri va xolisliksiz taqqoslash;
- iste’molchini chalg‘ituvchi reklama mazmuni;
- tijorat sirini ruxsatsiz oshkor etish;
- bozordan raqibni siqib chiqarishga urinishlar.
Mazkur holat O‘zbekiston raqamli chakana savdo maydonida raqobatning keskinlashganidan dalolat beradi. Bu esa reklamadagi axloqiy me’yorlar va huquqiy chegaralar muhimligini yana bir bor eslatadi.
