2025-yil 30-iyul kuni IT Park Ventures, AloqaVentures va Verifix startapi o‘rtasida investitsion kelishuv imzolandi. Ushbu kelishuv asosida loyiha $400 000 miqdorida mablag‘ jalb qildi. Bitim davlat venchur kapitalining uyg‘unligi natijasi bo‘lib, IT Park Ventures $150 000, AloqaVentures esa $250 000 sarmoya kiritdi.
Mazkur investitsiya Verifix’ning O‘zbekiston va xalqaro bozorga chiqish salohiyatini kengaytirish, jamoani kuchaytirish, mahsulotni rivojlantirish va raqamli hujjat aylanishi bo‘yicha korporativ hamda davlat yechimlari segmentida o‘z mavqeini mustahkamlashga yo‘naltiriladi.
Verifix haqida
Verifix — bu O‘zbekiston qonunchilik talablari asosida ishlab chiqilgan, raqamli imzolash, hujjatlarni saqlash va boshqarish uchun mo‘ljallangan texnologik platforma. Ushbu yechim bizneslarga hujjat aylanishini avtomatlashtirish, xarajatlarni kamaytirish hamda ichki jarayonlar shaffofligini oshirish imkonini beradi. Verifix joriy etilishi orqali kompaniyalar qog‘ozdan to‘liq voz kechib, korporativ axborotni raqamli boshqarish modeliga o‘tishlari mumkin.
Bugungi kunda Verifix xizmati O‘zbekistonning 200 dan ortiq yirik kompaniyalarida qo‘llanilmoqda — ularga banklar, sug‘urta tashkilotlari, logistika operatorlari va chakana savdo tarmoqlari kiradi. Jamoaning yaqin rejalari orasida — Markaziy Osiyo va Yaqin Sharq bozorlariga chiqish ko‘zda tutilgan. Ayniqsa HoReCa, chakana savdo, distribyutsiya, ishlab chiqarish hamda xizmat ko‘rsatish sohalariga urg‘u beriladi.
Azamat Karamatov, IT Park Ventures bosh direktori:
“Verifix — bu shunchaki texnologik yechim emas, balki iqtisodiyotning asosiy tarmoqlarini transformatsiya qilish uchun zarur bo‘lgan raqamli infratuzilmaning poydevoridir. Startap o‘zining yetukligi, moslashuvchanligi va aniq strategik qarashlari bilan xalqaro bozorga ishonchli chiqish imkoniyatini namoyon qilmoqda. Ayniqsa HoReCa, chakana savdo, distribyutsiya va ishlab chiqarish sohalaridagi salohiyati tahsinga loyiq. Bunday loyihalarni qo‘llab-quvvatlash orqali biz nafaqat raqamli iqtisodiyotning rivojlanishiga hissa qo‘shamiz, balki O‘zbekistonda yuqori malakali ish o‘rinlarining yaratilishini rag‘batlantiramiz. Bu esa institutsional investor sifatida bizning asosiy ustuvor yo‘nalishlarimizdan biridir.”
Islombek Sanakulov, loyihalar menejeri, AloqaVentures:
“AloqaVentures Verifix startapiga sarmoya kiritdi — bu Markaziy Osiyo va Kavkaz mintaqalarida kadrlar boshqaruvini kompleks avtomatlashtirishni taklif qiluvchi istiqbolli HR-tech startapidir. Verifix biznesning dolzarb muammolarini hal etib, jarayonlarning shaffofligi, intizomi va samaradorligini oshiradi. Kompaniya mintaqaning yetakchi korxonalari bilan hamkorligi orqali bozorda o‘zini allaqachon isbotlagan. Mazkur sarmoya AloqaVentures’ning mintaqada yuqori ko‘lamda o‘sish salohiyatiga ega texnologik yechimlarni qo‘llab-quvvatlashga qaratilgan strategik e’tiborini aks ettiradi.”
Mumin Salimov, Verifix hammuassisi va bosh direktori:
“IT Park Ventures va AloqaVentures tomonidan kiritilgan investitsiyalar biz olib borayotgan ishlarning strategik ahamiyatga egaligini yana bir bor tasdiqlaydi. Verifix inson resurslari (HR) jarayonlarini tubdan yangilashga qaratilgan: bu xodimlarni moslashtirishdan boshlab, shaffof va kengaytiriladigan iste’dodlarni boshqarish tizimlarini yaratishgacha bo‘lgan jarayonlarni qamrab oladi. Jalb qilingan mablag‘lar platformamiz rivojini, jamoamiz o‘sishini va yangi bozorga chiqishimizni tezlashtiradi. Biz samarali tashkilotlarning kelajagi — bu insonlar bilan tizimli ishlashda, deb hisoblaymiz.”
IT Park Ventures va AloqaVentures tomonidan Verifix’ga kiritilgan sarmoya — bu venchur kapital fondlari o‘rtasidagi hamkorlik qanday qilib yuqori salohiyatli startaplarni quvvatlab, raqamli iqtisodiyotning yangi o‘sish nuqtalarini yaratishi mumkinligining yorqin namunasi bo‘ldi.
IT Park Ventures’dan sarmoya jalb etish uchun quyidagi link orqali ariza qoldiring: itparkventures.uz
